खेड: गणेशोत्सवाचा सण मोठ्या उत्साहात साजरा करून मुंबईच्या दिशेने परतणाऱ्या कोकणातील चाकरमान्यांचा परतीचा प्रवास सुलभ, सुरक्षित आणि आर्थिकदृष्ट्या दिलासादायक व्हावा यासाठी यंदाही विशेष रेल्वेची व्यवस्था करण्यात आली आहे. दरवर्षी उत्सवानंतर कोकण रेल्वे मार्गावरील स्थानकांवर प्रवाशांची प्रचंड गर्दी उसळते आणि नियमित तसेच विशेष गाड्या धावत असल्या तरी तिकिटांचा अतिरिक्त खर्च अनेक कुटुंबांच्या खिशावर भार ठरतो. याच पार्श्वभूमीवर खेड, दापोली आणि मंडणगड विधानसभा मतदारसंघातील चाकरमान्यांच्या सोयीसाठी गृहराज्यमंत्री योगेश कदम यांच्या सहकार्यातून ‘खेड-दिवा’ अनारक्षित मेमू स्पेशल ही मोफत रेल्वे सेवा उपलब्ध करून देण्यात आली असून, या निर्णयामुळे गणेशभक्तांमधून मोठे समाधान व्यक्त होत आहे.
परतीच्या गर्दीचे योग्य नियोजन करण्याच्या उद्देशाने ही विशेष अनारक्षित मेमू गाडी येत्या २० आणि २१ सप्टेंबर रोजी खेड रेल्वेस्थानकातून सायंकाळी ४ वाजता सुटणार असून, रात्री १० वाजता ती दिवा स्थानकावर पोहोचेल. या मोफत प्रवासाचा लाभ घेण्यासाठी प्रवाशांना पास घेणे अनिवार्य असून, प्रवासाच्या दोन्ही दिवशी दुपारी ३ वाजल्यापासून खेड रेल्वेस्थानकावरच हे मोफत पास वितरित केले जाणार आहेत. मतदारसंघातील जास्तीत जास्त गणेशभक्तांनी वेळेत रेल्वेस्थानकावर उपस्थित राहून या पासचा तसेच मोफत प्रवासाचा लाभ घ्यावा, असे आवाहन संयोजकांनी केले आहे.
दरम्यान, या संपूर्ण उपक्रमाचे नेटके व्यवस्थापन आणि यशस्वी आयोजन करण्यासाठी शिवसेना तसेच राष्ट्रीय कर्मचारी सेना अंगीकृत रिक्षा सेनेचे पदाधिकारी सक्रीयपणे मैदानात उतरले आहेत. रेल्वेस्थानकावर प्रवाशांचे योग्य नियोजन करणे आणि पास वितरणाचे कामकाज सुरळीत पार पाडण्यासाठी शहरप्रमुख कुंदन सातपुते व उपनगराध्यक्ष सतीश चिकणे यांच्यासह सर्व प्रमुख पदाधिकारी सहकार्य करणार आहेत. कोकणातील सण आटोपून पुन्हा आपल्या कर्मभूमीकडे निघालेल्या हजारो चाकरमान्यांना या उपक्रमामुळे मोठा आर्थिक आणि प्रवासाचा दिलासा मिळणार आहे.
