खेड : येथील मध्यवर्ती एसटी बसस्थानक परिसरात नव्याने उभारण्यात आलेल्या दोन पेट्रोल पंपांचे संचालन कोणत्याही व्यक्ती अथवा संस्थेला परस्पर न देता अत्यंत पारदर्शक व खुल्या निविदा प्रक्रियेद्वारेच देण्यात यावे, अशी आग्रही मागणी युवा रोजगार जनहक्क संघर्ष संघाने राज्य शासनाकडे केली आहे. यासंदर्भात संघटनेचे संस्थापक अध्यक्ष बाळा खेडेकर यांच्या नेतृत्वाखालील शिष्टमंडळाने ३ नोव्हेंबर रोजी खेडचे प्रांताधिकारी यांच्यामार्फत राज्याच्या मुख्यमंत्र्यांना सविस्तर मागण्यांचे निवेदन सादर केले.
एसटी महामंडळाच्या जागेवर तयार करण्यात आलेल्या या दोन्ही पंपांच्या उभारणीचा खर्च, प्रत्यक्ष बांधकाम, जमिनीची अधिकृत मालकी, संबंधित तेल कंपनीसोबत झालेला करार आणि चालकाची निवड प्रक्रिया या सर्व बाबींची अधिकृत माहिती प्रशासनाने सार्वजनिक करावी, असा आग्रह संघटनेने धरला आहे. या प्रक्रियेत स्थानिक सुशिक्षित बेरोजगार तरुण आणि सर्वसामान्य स्थानिक व्यावसायिकांना व्यवसायाची समान व न्याय्य संधी मिळाली पाहिजे, अशी ठाम भूमिका या वेळी मांडण्यात आली.
जोपर्यंत या संपूर्ण प्रक्रियेत पारदर्शकता येत नाही आणि अंतिम व कायदेशीर निर्णय होत नाही, तोपर्यंत या पेट्रोल पंपांचा ताबा कोणालाही दिला जाऊ नये, असा इशाराही निवेदनातून देण्यात आला आहे. एसटीच्या महत्त्वाच्या जागेवरील या प्रकल्पात स्थानिक तरुणांच्या हिताला प्राधान्य देऊन प्रशासनाने तत्काळ पावले उचलावीत, अशी मागणी आता जोर धरू लागली आहे.
