शिपाई पदाची भरती प्रक्रिया रखडली; अंतिम मुदतीनंतर ६८ दिवस उलटूनही नियुक्ती नाही

पंचायत समिती रत्नागिरीच्या कार्यपद्धतीवर प्रश्नचिन्ह; वाटद-मिरवणे ग्रामपंचायतीतील चार अर्जदार प्रतीक्षेत

रत्नागिरी : तालुक्यातील ग्रामपंचायत वाटद-मिरवणे येथे शिपाई पदाच्या भरती प्रक्रियेला विलंब होत असल्याचे समोर आले आहे. या पदासाठी २३ जून २०२६ रोजी जाहिरात प्रसिद्ध करण्यात आली होती. अर्ज सादर करण्याची अंतिम मुदत १० जुलै २०२६ होती. ग्रामपंचायतीकडून मिळालेल्या माहितीनुसार या पदासाठी एकूण चार अर्ज प्राप्त झाले आहेत. मात्र अर्ज स्वीकारण्याची अंतिम मुदत संपून ६८ दिवस उलटूनही भरती प्रक्रिया पूर्ण झालेली नसल्याने अर्जदारांसह स्थानिक नागरिकांकडून प्रश्न उपस्थित केले जात आहेत.

अर्ज प्राप्त झाल्यानंतर त्यांची छाननी, पात्र उमेदवार निश्चित करणे आणि नियमानुसार पुढील नियुक्ती प्रक्रिया पूर्ण करणे अपेक्षित असताना ही प्रक्रिया सध्या नेमक्या कोणत्या टप्प्यावर आहे, याबाबत स्पष्ट माहिती समोर आलेली नाही. त्यामुळे ग्रामपंचायत तसेच पंचायत समिती स्तरावर या भरती प्रक्रियेसंदर्भात आतापर्यंत कोणती कार्यवाही करण्यात आली, याकडे लक्ष लागले आहे.

एका शिपाई पदासाठी अर्ज मागवून चार अर्ज प्राप्त झाल्यानंतरही नियुक्ती प्रक्रियेला एवढा कालावधी का लागत आहे, असा सवाल आरटीआय कार्यकर्ते तथा पत्रकार निलेश रहाटे यांनी उपस्थित केला आहे. भरती प्रक्रिया कोणत्या कारणामुळे रखडली आहे, संबंधित फाईल सध्या कोणत्या स्तरावर आहे आणि अर्जदारांना नियुक्तीसाठी आणखी किती प्रतीक्षा करावी लागणार, याबाबत प्रशासनाने स्पष्टता देण्याची मागणीही करण्यात येत आहे.

दरम्यान, वाटद येथील ग्रामसेवकांशी संपर्क साधला असता, शिपाई पदाची भरती प्रक्रिया पंचायत स्तरावरून होणार असून त्याबाबत त्यांना माहिती देण्यात आली आहे. ही भरती प्रक्रिया चालू महिन्यात पूर्ण होईल, असे त्यांनी सांगितले.

अंतिम मुदत संपल्यानंतर ६८ दिवसांचा कालावधी उलटूनही भरती प्रक्रिया पूर्ण झालेली नसताना आता प्रशासनाने दिलेल्या ‘या महिन्यात प्रक्रिया पूर्ण होईल’ या माहितीनुसार प्रत्यक्ष नियुक्ती कधी होते, याकडे अर्जदार आणि स्थानिक नागरिकांचे लक्ष लागले आहे. भरती प्रक्रियेत अनावश्यक विलंब होऊ नये, तसेच प्रशासकीय कामकाज वेळेत पूर्ण व्हावे, अशी अपेक्षा नागरिकांकडून व्यक्त केली जात आहे. त्यामुळे वाटद-मिरवणे ग्रामपंचायतीतील शिपाई पदाची भरती प्रक्रिया आता नेमकी कधी पूर्ण होते, हे पाहणे महत्त्वाचे ठरणार आहे.