रत्नागिरी (विशेष प्रतिनिधी): विवाहाचे खोटे प्रलोभन दाखवून एका तरुणीशी शारीरिक संबंध प्रस्थापित केल्यानंतर विवाहाचा प्रस्ताव धुडकावणाऱ्या साहिल प्रवीण कळंबटे (वय २७, रा. झरेवाडी, गोताडवाडी) या संशयित आरोपीला न्यायालयाने तीन दिवसांची पोलीस कोठडी सुनावली आहे. या प्रकरणी जयगड सागरी पोलीस ठाण्यात गुन्हा दाखल झाल्यानंतर पोलिसांनी गुरुवारी त्याला बेड्या ठोकून न्यायालयात हजर केले होते.
तक्रारदार तरुणीशी मैत्री वाढवून साहिलने तिला जानेवारी व मार्च महिन्यांच्या कालावधीत गणपतीपुळे येथे फिरण्याच्या बहाण्याने नेले होते. तेथील एका लॉजवर तिच्याशी गोड बोलून आणि लग्न करण्याचा विश्वास देऊन त्याने तिच्याशी वारंवार शारीरिक संबंध प्रस्थापित केले. इतकेच नव्हे तर या काळात त्याने तिचे आक्षेपार्ह फोटोही काढून ठेवले. त्यानंतर पीडितेने लग्नाबाबत विचारणा केली असता, त्याने लग्नास स्पष्ट नकार दिला. आपली फसवणूक झाल्याचे लक्षात येताच पीडित तरुणीने तात्काळ जयगड सागरी पोलीस ठाणे गाठून फिर्याद नोंदवली.
आरोपीला न्यायालयात हजर केले असता, विशेष सहाय्यक सरकारी वकील निलांजन नाचणकर यांनी पोलीस कोठडीची जोरदार मागणी केली. संशयिताची वैद्यकीय तपासणी पूर्ण करणे, मोबाईलमधील आक्षेपार्ह छायाचित्रे जप्त करणे आणि या गंभीर गुन्ह्यात त्याला आणखी कोणाचे सहकार्य लाभले आहे का, याचा कसून तपास करण्यासाठी पोलीस कोठडी अनिवार्य असल्याचा युक्तिवाद त्यांनी केला. हा युक्तिवाद ग्राह्य धरत न्यायालयाने साहिल कळंबटे याला तीन दिवसांची पोलीस कोठडी मंजूर केली आहे.
