गुहागर (प्रतिनिधी) : चिपळूण-गुहागर मार्गावरील खाटू मसाले उद्योगधंदे समोरील रस्त्यावर एसटी बसने मोटारसायकलला धडक दिल्याने झालेल्या अपघातात मोटारसायकलस्वार चैतन्य अनंत जाखळे (वय ३३, रा. असगोली खारवीवाडी, ता. गुहागर) हे गंभीर जखमी झाले. हा अपघात १३ सप्टेंबर २०२६ रोजी सायंकाळी ४.१० वाजण्याच्या सुमारास घडला. या प्रकरणी एसटी बसचालकाविरुद्ध गुहागर पोलिस ठाण्यात गुन्हा दाखल करण्यात आला आहे.
याबाबत गुहागर पोलिस ठाण्यातील पोलिस हवालदार अनिकेत अविनाश चव्हाण यांनी फिर्याद दिली. त्यानुसार आरोपी नामदेव शिवाजी पवार (वय ४०, मूळ रा. भानखेडा, ता. शेणगाव, जि. हिंगोली; सध्या रा. संभाजीनगर, वाळुंज) याच्याविरुद्ध गुन्हा दाखल करण्यात आला आहे.
पोलिसांच्या नोंदीनुसार, चैतन्य जाखळे हे रॉयल एनफिल्ड बुलेट (एमएच-०८-बीएफ-२६९१) घेऊन चिपळूणहून गुहागरच्या दिशेने जात होते. खाटू मसाले उद्योगधंदे समोरील वळणावर आले असता समोरून गुहागरच्या दिशेने येणाऱ्या एसटी बस (एमएच-१४-बीटी-४६६७) चालकाने पुढील वाहनाला ओव्हरटेक करताना रस्त्याच्या उजव्या बाजूला येऊन मोटारसायकलला धडक दिल्याचे फिर्यादीत नमूद आहे.
या धडकेत चैतन्य जाखळे यांच्या डोक्याला गंभीर दुखापत झाली असून त्यांच्या मोटारसायकलचेही नुकसान झाले. बसचालकाने रस्त्याच्या परिस्थितीकडे दुर्लक्ष करून वाहन भरधाव, बेदरकार व निष्काळजीपणे चालविल्याचा आरोप आहे.
या प्रकरणी गुहागर पोलिस ठाण्यात गुन्हा रजिस्टर क्रमांक ९६/२०२६ नुसार भारतीय न्यायसंहिता २०२३ मधील कलम २८१, १२५(अ), १२५(ब) तसेच मोटार वाहन कायदा कलम १८४ अन्वये गुन्हा दाखल करण्यात आला आहे.
