चिपळूण: खेर्डी एमआयडीसीत संशयास्पदरीत्या फिरणारा तरुण तांब्याच्या तारांसह अटकेत

चिपळूण : खर्डी एमआयडीसी परिसरात पहाटेच्या सुमारास संशयास्पदरीत्या फिरणाऱ्या २१ वर्षीय तरुणाकडून १ किलो ८०० ग्रॅम वजनाच्या तांब्याच्या तारा आढळून आल्याने स्थानिक गुन्हे अन्वेषण शाखेने कारवाई केली. सुमारे एक हजार रुपये किमतीच्या या तांब्याच्या तारा पोलिसांनी जप्त केल्या असून, संबंधित तरुणाविरुद्ध चिपळूण पोलीस ठाण्यात गुन्हा दाखल करण्यात आला आहे.

२२ सप्टेंबर २०२६ रोजी पहाटे सुमारे २.४५ वाजण्याच्या सुमारास स्थानिक गुन्हे अन्वेषण शाखेचे पथक खर्डी एमआयडीसी परिसरात गस्त घालत होते. यावेळी चामुंडा स्टील अँड टिंबर दुकानासमोर प्रणय रमाकांत जाधव (वय २१, रा. सती, समर्थनगर, ता. चिपळूण, जि. रत्नागिरी) हा संशयास्पदरीत्या आढळून आला.

पोलिसांनी त्याची चौकशी करून त्याच्याकडील प्लास्टिकच्या गोणीची तपासणी केली असता त्यामध्ये १ किलो ८०० ग्रॅम वजनाच्या सुमारे एक हजार रुपये किमतीच्या तांब्याच्या तारा आढळून आल्या. या तारांबाबत पोलिसांनी विचारणा केली असता त्याच्या मालकी हक्काबाबत तो समाधानकारक खुलासा करू शकला नाही. त्यामुळे पोलिसांनी तांब्याच्या तारांचा मुद्देमाल जप्त करून त्याच्याविरुद्ध कारवाई केली.

या प्रकरणी स्थानिक गुन्हे अन्वेषण शाखेचे पोलीस हवालदार दिपराज प्रकाश पाटील (ब.नं. १४०७) यांनी चिपळूण पोलीस ठाण्यात फिर्याद दिली. त्यांच्या फिर्यादीवरून प्रणय जाधव याच्याविरुद्ध गुन्हा रजिस्टर नंबर २९६/२०२६ अन्वये महाराष्ट्र पोलीस कायदा १९५१ चे कलम १२४ प्रमाणे गुन्हा दाखल करण्यात आला आहे. प्रकरणाचा पुढील तपास चिपळूण पोलीस करीत आहेत.