कोल्हापूर: येथील गणेश विसर्जन मिरवणुकीदरम्यान गोखले कॉलेज चौकात शुक्रवारी सकाळी सव्वादहाच्या सुमारास एक दुर्दैवी घटना घडली. पश्चिम महाराष्ट्रात आपल्या विशेष कारागिरीसाठी प्रसिद्ध असलेली वाय. पी. पोवार नगर सार्वजनिक गणेशोत्सव मंडळाची २१ फुटी भव्य गणेशमूर्ती विद्युत तारेचा धक्का लागल्याने थेट रस्त्यावर कोसळली. एका पायावर तोल सांभाळलेली ही ‘बॅलेंसिंग’ मूर्ती डोळ्यांदेखत कोसळल्याने भाविक आणि कार्यकर्त्यांमध्ये एकच खळबळ उडाली, मात्र सुदैवाने या दुर्घटनेत कोणतीही जीवितहानी झाली नाही.
वाय. पी. पोवार नगर येथून पारंपरिक उत्साहात ही मूर्ती ट्रॅक्टर ट्रॉलीवरून विसर्जन मार्गावर निघाली होती. गोखले कॉलेज चौकात मिरवणूक पोहोचली असता, मार्गावरील वीजवाहिनीचा स्पर्श मूर्तीला झाला आणि काही क्षणांतच संपूर्ण मूर्ती रस्त्यावर कलंडून कोसळली. मूर्ती पडताच परिसरात काही काळ गोंधळाचे वातावरण निर्माण झाले होते. घटनेचे गांभीर्य ओळखून वरिष्ठ पोलीस अधिकारी आणि अग्निशमन दलाच्या पथकाने तातडीने घटनास्थळी धाव घेत जमावाला शांत केले व परिस्थिती नियंत्रणात आणली. यानंतर क्रेनच्या साहाय्याने मूर्ती रस्त्याच्या एका बाजूला हलवण्यात आली.
या दुर्घटनेनंतर विसर्जन मार्गावरील सुरक्षेवरून आरोप-प्रत्यारोप सुरू झाले आहेत. विसर्जन मार्गावरील लटकणाऱ्या विद्युत तारा आणि झाडांच्या फांद्या हटवण्याबाबत महावितरणकडे वारंवार पाठपुरावा करण्यात आला होता, मात्र प्रशासनाने दुर्लक्ष केल्यामुळेच ही दुर्घटना घडल्याचा थेट आरोप मंडळाच्या कार्यकर्त्यांनी केला आहे. दुसरीकडे, महावितरणने हे सर्व आरोप फेटाळून लावले असून विसर्जन मार्गावरील सर्व आवश्यक ती दुरुस्ती व कामे वेळेत पूर्ण करण्यात आली होती, तसेच मिरवणूक मार्गावर महावितरणचे तांत्रिक पथकही मदतीसाठी तैनात होते, असा दावा प्रशासनाने केला आहे. या अपघातानंतर सर्व औपचारिकता आणि नियमांचे पालन करत पोलीस व कार्यकर्त्यांच्या उपस्थितीत मूर्तीची विधिवत पूजा करून विसर्जन करण्यात आले असले, तरी या घटनेमुळे संपूर्ण शहरात हळहळ व्यक्त केली जात आहे.
