गणपतीपुळे/ वैभव पवार : रत्नागिरी तालुक्यातील जागतिक कीर्तीचे पर्यटन स्थळ असलेल्या श्री क्षेत्र गणपतीपुळे येथील महाराष्ट्र पर्यटन विकास महामंडळाच्या (एमटीडीसी) पर्यटक निवासात रविवार, २७ सप्टेंबर रोजी जागतिक पर्यटन दिन उत्साहात साजरा करण्यात येणार आहे. यानिमित्ताने महामंडळातर्फे विविध समाजोपयोगी, शैक्षणिक आणि पर्यावरणपूरक कार्यक्रमांची जय्यत तयारी करण्यात आली आहे.
यंदा जागतिक स्तरावर ‘डिजिटल अजेंडा आणि कृत्रिम बुद्धिमत्तेद्वारे पर्यटनाची पुनर्रचना’ हे घोषवाक्य निश्चित करण्यात आले असून, या संकल्पनेला अनुसरून स्थानिक पातळीवर पर्यटनाला नवी दिशा देण्याचा प्रयत्न केला जात आहे. या दिनाचे औचित्य साधून प्रसिद्ध गणपतीपुळे समुद्रकिनाऱ्यावर भव्य स्वच्छता अभियान राबवले जाणार आहे. विद्यार्थ्यांच्या कल्पकतेला आणि विचारांना व्यासपीठ मिळवून देण्यासाठी मालगुंड येथील मुरारी तथा भाई मयेकर जुनियर कॉलेजमध्ये निबंध स्पर्धा, तर गणपतीपुळे येथील जिल्हा परिषद पूर्ण प्राथमिक शाळेत चित्रकला स्पर्धेचे आयोजन करण्यात आले आहे.
याशिवाय पर्यावरण संवर्धनाचा संदेश देण्यासाठी पर्यटक निवासात मुक्कामी असणाऱ्या पाहुण्यांच्या हस्ते वृक्षारोपण केले जाईल, तसेच पर्यटनासाठी नव्याने दाखल होणाऱ्या पाहुण्यांचे पुष्पगुच्छ देऊन पारंपरिक पद्धतीने स्वागत करण्यात येणार आहे. एमटीडीसीच्या वतीने आयोजित या सर्व उपक्रमांमध्ये गणपतीपुळे व परिसरातील पर्यटनप्रेमी, स्थानिक पर्यटन व्यावसायिक, ग्रामस्थ आणि विद्यार्थ्यांनी मोठ्या संख्येने सहभागी व्हावे, असे आवाहन एमटीडीसी गणपतीपुळे पर्यटक निवासाचे व्यवस्थापक व कर्मचाऱ्यांनी केले आहे.
