५ ऑक्टोबरच्या जिल्हा मेळाव्याला मोठ्या संख्येने उपस्थित राहण्याचे जिल्हाध्यक्ष ॲड. जमीर खलिफे यांचे आवाहन
राजापूर/ तुषार पाचलकर: राष्ट्रपिता महात्मा गांधी आणि माजी पंतप्रधान लाल बहाद्दूर शास्त्री यांच्या जयंतीचे औचित्य साधून राजापूर तालुका काँग्रेस कमिटीच्या कार्यालयात पक्षाची महत्त्वपूर्ण आढावा बैठक उत्साहात पार पडली. बैठकीच्या प्रारंभी उभय महापुरुषांच्या प्रतिमांना पुष्पहार अर्पण करून भावपूर्ण आदरांजली वाहण्यात आली. यावेळी पक्षाचे नवनियुक्त तालुकाध्यक्ष सतीश बंडबे यांचा उपस्थित पदाधिकाऱ्यांच्या हस्ते सत्कार करण्यात आला, तर राजापूर नगर परिषदेच्या लोकनियुक्त नगराध्यक्षा तथा माजी आमदार ॲड. हुस्नबानू खलिफे यांनी महापुरुषांच्या विचार आणि कार्यावर प्रकाश टाकत आपले मनोगत व्यक्त केले.
याप्रसंगी काँग्रेस पक्षाशी एकनिष्ठ राहिलेले ज्येष्ठ कार्यकर्ते सुरेंद्र तांबे (गुरुजी) यांच्या अमृतमहोत्सवी (७५ व्या) वर्षानिमित्त त्यांचा विशेष गौरव करण्यात आला. तसेच पक्षाचे ज्येष्ठ कार्यकर्ते व सल्लागार वसंत आंबेलकर यांच्या मातोश्रींचे नुकतेच निधन झाल्याने बैठकीत शोक व्यक्त करून त्यांना श्रद्धांजली वाहण्यात आली.
बैठकीत आगामी काळातील संघटनात्मक बांधणीवर सखोल चर्चा झाली. नवनियुक्त तालुकाध्यक्ष सतीश बंडबे यांच्या नेतृत्वाखाली तालुक्यातील नवीन कार्यकारिणीची रूपरेषा निश्चित करण्यात आली असून, तिची अधिकृत घोषणा पुढील आढावा बैठकीत केली जाणार असल्याचे ठरले. दरम्यान, येत्या ५ ऑक्टोबर रोजी रत्नागिरी येथे दक्षिण रत्नागिरी जिल्हा काँग्रेसची महत्त्वपूर्ण बैठक आयोजित करण्यात आली असून, राजापूर तालुक्यातील काँग्रेस पदाधिकारी व कार्यकर्त्यांनी मोठ्या संख्येने उपस्थित राहावे, असे आवाहन जिल्हाध्यक्ष ॲड. जमीर खलिफे यांनी केले.
या आढावा बैठकीस माजी आमदार ॲड. हुस्नबानू खलिफे, दक्षिण रत्नागिरी जिल्हाध्यक्ष ॲड. जमीर खलिफे, तालुकाध्यक्ष सतीश बंडबे, ज्येष्ठ कार्यकर्ते देवदत्त वालावलकर, शहराध्यक्ष अजीम जैतापकर, लियाकत काझी, नगरसेवक सिद्धांत जाधव, सुलतान ठाकूर, स्वीकृत नगरसेवक महेश शिवलकर, नगरसेविका शबाना मुल्ला, अमिना गडकरी, जान्हवी वादक यांच्यासह अफरोज झारी, अदनान खलिफे, इम्रान मुजावर, हारून साठी, गुरुनाथ आडीवरेकर आदी पदाधिकारी व कार्यकर्ते मोठ्या संख्येने उपस्थित होते.
