तुषार पाचलकर (राजापूर): क्रीडा व युवक सेवा संचालनालय, महाराष्ट्र राज्य (पुणे) यांच्या मान्यतेने, जिल्हा क्रीडा परिषद व जिल्हा क्रीडा अधिकारी कार्यालय रत्नागिरी, पंचायत समिती राजापूर आणि राजापूर तालुका क्रीडा व शारीरिक शिक्षण शिक्षक संघटना यांच्या संयुक्त विद्यमाने आयोजित राजापूर तालुकास्तरीय शालेय क्रीडा स्पर्धा नुकतीच उत्साहात पार पडली. या स्पर्धेतील १७ वर्षांखालील मुलांच्या व्हॉलीबॉल क्रीडा प्रकारात सरस्वती विद्यामंदिर व कनिष्ठ महाविद्यालय, पाचलच्या संघाने उत्कृष्ट सांघिक खेळाचे प्रदर्शन करत तालुक्यात प्रथम क्रमांक पटकावला आहे.
तालुकास्तरावर मिळवलेल्या या शानदार यशामुळे पाचल विद्यालयाच्या व्हॉलीबॉल संघाची आता रत्नागिरी जिल्हास्तरीय व्हॉलीबॉल स्पर्धेसाठी निवड झाली आहे. या यशस्वी संघाला विद्यालयाचे क्रीडा शिक्षक नितीन सांडम यांचे विशेष तांत्रिक मार्गदर्शन लाभले.
संघाच्या या यशाबद्दल पाचल पंचक्रोशी शिक्षण प्रसारक मंडळ संस्थेचे अध्यक्ष राजेश सावंत, कार्याध्यक्ष अशोक सक्रे, सचिव रामचंद्र वरेकर, सहसचिव किशोर नारकर, खजिनदार राजन लब्दे यांच्यासह सर्व संचालक मंडळ, प्रशालेच्या मुख्याध्यापिका आशा गुरखे, पर्यवेक्षिका प्रमिला गांधी आणि शिक्षक-शिक्षकेतर कर्मचाऱ्यांनी खेळाडू व मार्गदर्शकांचे अभिनंदन केले आहे. आगामी जिल्हास्तरीय स्पर्धेतही संघाने अशीच चमकदार कामगिरी करावी, यासाठी तालुक्यातील विविध क्षेत्रांतून खेळाडूंवर कौतुकाचा वर्षाव होत आहे.
