जमीन संपादन व मोबदला वाटपात गैरव्यवहार; एसआयटी चौकशी पूर्ण होईपर्यंत प्रक्रिया थांबवा : मनसे जिल्हाध्यक्ष अविनाश सौंदळकर

राजापूर/ तुषार पाचलकर: महामार्गासाठी किंवा विविध प्रकल्पांसाठी सुरू असलेल्या जमीन संपादन आणि त्यापोटी दिल्या जाणाऱ्या मोबदला वाटपात मोठ्या प्रमाणावर अनियमितता व गैरव्यवहार झाल्याचा गंभीर आरोप समोर आला आहे. या प्रकरणाची सखोल एसआयटी (SIT) चौकशी सुरू असून, जोपर्यंत ही चौकशी पूर्ण होत नाही, तोपर्यंत प्रशासनाने घाईघाईत कोणतीही जागा ताब्यात घेऊ नये आणि मोबदला वाटप करू नये, अशी परखड भूमिका मनसे जिल्हाध्यक्ष अविनाश सौंदळकर यांनी मांडली आहे.

संबंधित अधिकारी आणि मध्यस्थ दलालांच्या संगनमताने नियमबाह्य पद्धतीने मोबदला लाटण्याचे प्रयत्न सुरू असल्याचा आरोप त्यांनी केला आहे. यापूर्वी काही ठरावीक लोकांना शेकडो पटीने अतिरिक्त मोबदला दिल्याचा संशय असून, म्हणूनच या संपूर्ण प्रकरणाची एसआयटी चौकशी लावली गेली आहे. असे असतानाही, मूळ चौकशीचा अहवाल येण्याआधीच अधिकारी व दलाल इतर जमिनींच्या संपादन प्रक्रियेत आणि मोबदला वितरणात अवाजवी घाई करत असल्याचे चित्र निर्माण झाले आहे.

ब्राह्मण खोरे आणि सांडवे खोरे या भागातील जमिनींच्या भूसंपादनावर त्यांनी तीव्र आक्षेप नोंदवला आहे. महाड दुर्घटनेच्या वेळी डोंगराच्या पायथ्याशी असलेली घरे कोसळल्याची पार्श्वभूमी असताना, डोंगराच्या पायथ्याशी पुनर्वसन किंवा प्रकल्प उभारू नयेत, असे स्पष्ट निर्देश होते. तरीही या खोऱ्यातील जागा ताब्यात घेऊन नागरिकांच्या जिवाशी खेळण्याचा घाट घातला जात आहे का, असा सवाल त्यांनी उपस्थित केला आहे. याशिवाय, प्रत्यक्ष जागेवर नसलेली खोटी झाडे कागदावर दाखवून मोबदला लाटण्याचा प्रकारही घडल्याचे त्यांनी नमूद केले.

या पार्श्वभूमीवर शेतकऱ्यांनी आणि ग्रामस्थांनी कोणत्याही दलालांच्या किंवा अधिकाऱ्यांच्या भूलथापांना बळी पडू नये, असे आवाहन करण्यात आले आहे. शेतकऱ्यांना त्यांच्या हक्काचा संपूर्ण आणि योग्य मोबदला मिळालाच पाहिजे, यात दुमत नाही; परंतु दलाल आणि भ्रष्ट अधिकाऱ्यांची ही लूट त्वरित थांबली पाहिजे.

शेतकऱ्यांची कोणतीही फसवणूक खपवून घेतली जाणार नसून, या संपूर्ण लढ्यात आपण १०० टक्के शेतकऱ्यांच्या पाठीशी ठामपणे उभे आहोत, असा निर्धारही मनसे जिल्हाध्यक्ष अविनाश सौंदळकर यांनी व्यक्त केला आहे.