संगमेश्वर : तालुक्यातील सोनवडे मधलीवाडी येथे घरात अंथरुणावरून उठताना तोल जाऊन जमिनीवर पडल्याने गंभीर जखमी झालेल्या ७० वर्षीय वृद्धाचा उपचारादरम्यान मृत्यू झाला आहे. रामचंद्र गोविंद शिवगण (वय ७०, रा. सोनवडे मधलीवाडी, ता. संगमेश्वर) असे मृत वृद्धाचे नाव असून, याप्रकरणी देवरूख पोलीस ठाण्यात आकस्मिक मृत्यूची नोंद करण्यात आली आहे.
मिळालेल्या माहितीनुसार, रामचंद्र शिवगण हे २५ सप्टेंबर रोजी सकाळी सहा वाजण्याच्या सुमारास घरातील अंथरुणावरून उठत असताना अचानक तोल जाऊन जमिनीवर जोरात आदळले. या अपघातात त्यांच्या डोक्याला गंभीर दुखापत झाली. कुटुंबीयांच्या ही बाब तात्काळ लक्षात आल्यानंतर त्यांचे सुपुत्र योगेश रामचंद्र शिवगण यांनी स्थानिकांच्या मदतीने त्यांना उपचारासाठी तातडीने रत्नागिरी येथील शासकीय जिल्हा रुग्णालयात (सिव्हिल हॉस्पिटल) दाखल केले. रुग्णालयात त्यांच्यावर अतिदक्षता विभागात उपचार सुरू होते; मात्र उपचारादरम्यान २६ सप्टेंबर रोजी मध्यरात्री सव्वा बारा वाजण्याच्या सुमारास त्यांची प्राणज्योत मालवली. वैद्यकीय अधिकाऱ्यांनी तपासणीअंती त्यांना मयत घोषित केले.
या घटनेबाबत योगेश रामचंद्र शिवगण यांनी दिलेल्या माहितीवरून देवरूख पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये आकस्मिक मृत्यू क्रमांक ४२/२०२६ नुसार नोंद करण्यात आली असून पोलीस अधिक तपास करत आहेत.
