लखनऊ :उत्तर प्रदेशच्या सुलतानपूरमध्ये झालेल्या भीषण रस्ता अपघातात लष्करी जवानाचा पार्थिव देह घेऊन देवरियाला परतणाऱ्या चार जणांचा मृत्यू झाल्यानंतर सोमवारी गहिला दुधैला गावावर शोककळा पसरली.
या अपघातात जवानाचा एकुलता एक मुलगा गौरव सिंह (2८), मोठा भाऊ रामसमुझ (५५), नातेवाईकाचा मुलगा राजन सिंह (३५) आणि रुग्णवाहिका चालक जसपाल सिंह यांचा मृत्यू झाला.
सोमवारी सकाळी साडेसहाच्या सुमारास दोन रुग्णवाहिकांमधून सर्वांचे पार्थिव देह गावात पोहोचले. त्यावेळी नातेवाईकांच्या आक्रोशाने वातावरण गहिवरून गेले. अंत्यदर्शनासाठी हजारो ग्रामस्थांनी गर्दी केली होती.
गहिला दुधैला गावातील रहिवासी सुभेदार मेजर सत्यवान सिंह यांचा चंडीगड येथील लष्करी कमांड रुग्णालयात मूत्रपिंड प्रत्यारोपणाच्या तीन दिवसांनंतर मृत्यू झाला होता. त्यानंतर पंचकुलाहून त्यांचा पार्थिव देह रुग्णवाहिकेतून देवरियाला आणला जात होता. रुग्णवाहिकेत सत्यवान सिंह यांच्या कुटुंबातील सदस्यही होते. रविवारी सकाळी सव्वाआठच्या सुमारास सुलतानपूर जिल्ह्यात अयोध्या सीमेच्या जवळ पूर्वांचल एक्स्प्रेस-वेवर हलियापूरजवळ रुग्णवाहिकेला अपघात झाला.
धडक इतकी भीषण होती की रुग्णवाहिकेतील सर्व जण गंभीर जखमी झाले. माहिती मिळताच पोलिसांनी घटनास्थळी पोहोचून सर्वांना रुग्णालयात दाखल केले. तेथे डॉक्टरांनी गौरव सिंह, रामसमुझ, राजन सिंह आणि चालक जसपाल यांना मृत घोषित केले. अपघातानंतर सत्यवान सिंह यांचा पार्थिव देह हलियापूर पोलीस ठाण्यात ठेवण्यात आला, तर मृतांच्या पार्थिव देहांना शवविच्छेदनासाठी पाठवण्यात आले. रविवारी उशिरा शवविच्छेदनाची प्रक्रिया पूर्ण झाल्यानंतर मृतांचे पार्थिव देह देवरियासाठी रवाना करण्यात आले.
सोमवारी सकाळी पार्थिव देह गावात पोहोचताच शोककळा पसरली. लष्करी जवान सत्यवान सिंह यांच्या पत्नी सरोजनी देवी पतीचे पार्थिव पाहून ढसाढसा रडू लागल्या. सत्यवान सिंह यांच्या पार्थिव देहासोबत त्यांचा एकुलता एक मुलगा आणि मोठ्या भावाचा पार्थिव देहही पोहोचल्याने कुटुंबावर दुःखाचा डोंगर कोसळला. मृत राजन सिंह हे सध्या नगरसेवकही होते. त्यांचा पार्थिव देह रुद्रपूरमधील भरटोली वॉर्ड येथील घरी नेण्यात आला. तेथे नातेवाईकांच्या आक्रोशाने वातावरण गहिवरून गेले. अंत्यदर्शनानंतर सर्व पार्थिव देह अंत्यसंस्कारासाठी रुद्रपूरमधील बथुआ नदीच्या काठावर असलेल्या बैकुंठ धाम येथे नेण्यात आले.
अंतिम यात्रेत हजारो नागरिक सहभागी झाले. यावेळी ‘भारत माता की जय’ आणि ‘सत्यवान सिंह अमर रहे’च्या घोषणा देण्यात आल्या. बैकुंठ धाम येथे चारही पार्थिव देहांसाठी स्वतंत्र चिता तयार करण्यात आल्या. एकाच वेळी चार जणांचा मृत्यू झाल्याने संपूर्ण परिसरात शोककळा पसरली आहे.
कुटुंबीयांच्या म्हणण्यानुसार, सत्यवान सिंह यांचा पार्थिव देह पूर्ण सन्मानाने गावात आणून अंत्यसंस्कार करण्यासाठी सर्व जण परतत होते. मात्र, घरापर्यंत पोहोचण्यापूर्वीच रस्त्यात अशी भीषण दुर्घटना घडेल, याची कोणालाही कल्पना नव्हती. ज्या व्यक्तीला अंतिम निरोप देण्यासाठी कुटुंबीय परतत होते, त्याच व्यक्तीसोबत त्यांचा एकुलता एक मुलगा, मोठा भाऊ आणि नातेवाईकही या जगातून निघून गेले. कृषिमंत्री सूर्य प्रताप शाही यांच्यासह परिसरातील नेतेही घटनास्थळी पोहोचले. त्यांनी लष्करी जवानाला अंतिम निरोप दिला.
पत्नीने मागितली नुकसानभरपाई
सुभेदार मेजर सत्यवान सिंह यांच्या पत्नी सरोजनी देवी यांनी जिल्हाधिकारी मधुसूदन हुल्गी आणि पोलीस अधीक्षक अभिजित आर. शंकर यांना पत्र देऊन मुख्यमंत्र्यांकडून प्रत्येक आश्रित कुटुंबाला पाच-पाच कोटी रुपयांची आर्थिक मदत देण्याची मागणी केली आहे. गावात सत्यवान सिंह यांच्या नावाने भव्य प्रवेशद्वार उभारावे, त्यांच्या नावाने पेट्रोल पंप मंजूर करावा आणि कुटुंबातील सदस्यांना सरकारी नोकरी द्यावी, अशीही मागणी त्यांनी केली आहे. या दुःखाच्या प्रसंगी सरकारने सर्वतोपरी मदत करावी, अशी विनंती कुटुंबीयांनी केली आहे.
