रत्नागिरी : रत्नागिरी जिल्ह्यातील वीज वितरण व्यवस्था अधिक सुरक्षित, सक्षम आणि अखंडित करण्याच्या उद्देशाने महावितरणमार्फत राबवण्यात येणाऱ्या भूमिगत विद्युत वाहिन्यांच्या कामांना मोठी गती मिळाली आहे. अधीक्षक अभियंता, महाराष्ट्र राज्य विद्युत वितरण कंपनी, रत्नागिरी यांच्याकडून प्राप्त झालेल्या अहवालानुसार, लांजा, राजापूर आणि रत्नागिरी या तीन तालुक्यांमध्ये उच्चदाब वाहिन्यांचे उद्दिष्ट यशस्वीरीत्या पूर्ण झाले आहे. यामध्ये ३३ केव्ही भूमिगत वाहिनीचे ३४ किलोमीटर आणि ११ केव्ही भूमिगत वाहिनीचे २१० किलोमीटरचे उद्दिष्ट शंभर टक्के पूर्ण झाले असून, एकूण १ हजार ३६२ किलोमीटरच्या लघुदाब भूमिगत वाहिन्यांपैकी ५९४ किलोमीटरचे काम पूर्ण झाले आहे.
या संपूर्ण प्रकल्पांतर्गत वीज वितरण यंत्रणेचे सक्षमीकरण करण्यासाठी ३० नवीन रोहित्र उभारण्याचे उद्दिष्टही पूर्ण करण्यात आले असून, यामुळे ग्रामीण व शहरी भागातील वीजपुरवठ्याची क्षमता वाढण्यास मोठी मदत होणार आहे. कोकणातील वादळी वाऱ्यांसह प्रतिकूल आणि आव्हानात्मक हवामानात पारंपरिक वीजवाहिन्यांचे होणारे नुकसान रोखणे आणि तांत्रिक बिघाड टाळणे या भूमिगत वाहिन्यांमुळे शक्य होणार आहे. उर्वरित लघुदाब वाहिन्यांचे काम सध्या वेगाने सुरू असून, हे काम पूर्ण होताच वारंवार निर्माण होणारे अडथळे दूर होऊन जिल्ह्यातील वीजपुरवठ्याची विश्वासार्हता अधिक बळकट होणार आहे.
