रत्नागिरी: रत्नागिरी-संगमेश्वर विधानसभा मतदारसंघातील जलजीवन मिशन अंतर्गत सुरू असलेली नळपाणी पुरवठा योजनांची कामे विहित मुदतीत पूर्ण न करणाऱ्या ठेकेदारांवर कडक कारवाई करत त्यांना भविष्यात थेट काळ्या यादीत टाकण्यात येईल, असा सक्त इशारा उद्योगमंत्री तथा जिल्ह्याचे पालकमंत्री डॉ. उदय सामंत यांनी दिला आहे. स्थानिक शासकीय विश्रामगृहात आयोजित जलजीवन मिशनच्या आढावा बैठकीत ते बोलत होते.
भविष्यातील संभाव्य दुष्काळी परिस्थिती आणि पाणीटंचाई लक्षात घेता नागरिकांना वेळेत पाणी उपलब्ध होणे गरजेचे आहे. त्यासाठी ग्रामीण पाणी पुरवठा विभाग आणि महावितरणने आपापसात योग्य समन्वय ठेवून प्रलंबित कामे जलदगतीने मार्गी लावावीत, असे निर्देश पालकमंत्र्यांनी दिले. विकासकामांमध्ये स्थानिक नागरिक किंवा अन्य कुणी अडथळा निर्माण करत असल्यास संबंधितांवर पोलीस ठाण्यात तात्काळ तक्रार दाखल करण्याचे आदेशही त्यांनी दिले. या बैठकीस उपविभागीय अधिकारी जीवन देसाई, ग्रामीण पाणी पुरवठा विभागाचे कार्यकारी अभियंता अमोल दाभोळकर, महावितरणचे अधीक्षक अभियंता सुधाकर जाधव यांच्यासह मतदारसंघातील ठेकेदार उपस्थित होते.
या दौऱ्यादरम्यान डॉ. सामंत यांनी शामराव पेजे शासकीय अभियांत्रिकी महाविद्यालयातील विद्यार्थ्यांच्या अडचणींचीही प्रत्यक्ष दखल घेतली. महाविद्यालयात प्राध्यापक व कर्मचाऱ्यांची कमतरता, अद्ययावत प्रशिक्षणाचा अभाव आणि प्रयोगशाळेत पुरेशी उपकरणे नसणे अशा गंभीर समस्या विद्यार्थ्यांनी त्यांच्यासमोर मांडल्या. यावर विद्यार्थ्यांच्या सर्व शैक्षणिक अडचणी तातडीने सोडविल्या जातील, अशी ग्वाही पालकमंत्र्यांनी दिली. तसेच महाविद्यालयात ‘टेक्निकल फेस्टिव्हल’ आणि ‘ऑटो एक्स्पो’सारख्या राज्यस्तरीय उपक्रमांच्या आयोजनासाठी सर्वतोपरी शासकीय सहकार्य उपलब्ध करून देण्याचे त्यांनी स्पष्ट केले. या वेळी प्राचार्य सुधीर अकोजवार, विद्यार्थी प्रतिनिधी व विद्यार्थी उपस्थित होते.
दुसऱ्या एका महत्त्वपूर्ण आढाव्यात मच्छिमार आणि मत्स्यकास्तकारांच्या प्रश्नांवरही चर्चा झाली. ९ मे २०२५ च्या शासन निर्णयानुसार मत्स्यव्यवसाय क्षेत्राला कृषी क्षेत्राप्रमाणेच सवलती लागू करण्यात आल्या आहेत. याअंतर्गत प्रक्रिया उद्योग वगळता मत्स्यसंवर्धकांना कृषी दराने वीज पुरवठा करण्याच्या तरतुदीनुसार मत्स्यव्यवसाय विभागाने पाठविलेल्या ५६ प्रस्तावांपैकी २२ प्रस्तावांना मंजुरी मिळाली आहे. या सर्व मंजूर प्रस्तावांना महावितरणने तत्काळ कृषी दराने वीज पुरवठा सुरू करावा, अशा सूचना पालकमंत्र्यांनी दिल्या. या बैठकीला मत्स्यव्यवसाय विभागाचे सहायक आयुक्त जीवन सावंत, नगरसेवक बंड्या साळवी, माजी नगरसेवक सुदेश मयेकर आणि ॲड. समृद्धी मयेकर उपस्थित होते.
