खेड: भारतीय जनता पार्टी खेड आणि राजवैभव प्रतिष्ठान यांच्या संयुक्त विद्यमाने शहरातील छत्रपती शिवाजी महाराज चौक येथे ११ ते २१ ऑक्टोबर २०२६ या कालावधीत श्री अंबाभवानी सार्वजनिक नवरात्रोत्सवाचे भव्य आयोजन करण्यात आले आहे. गेल्या १९ वर्षांची गौरवशाली परंपरा जपत खेडवासीयांच्या सहकार्याने हा उत्सव मोठ्या भक्तीभावात साजरा होत असून, यंदा दररोज रात्री रंगणाऱ्या ‘नमो दांडिया’ स्पर्धेमुळे शहरात तरुणाईचा उत्साह शिगेला पोहोचणार असल्याची माहिती भाजपा नेते तथा खेड नगर परिषदेचे माजी नगराध्यक्ष ॲड. वैभव खेडेकर यांनी दिली.
घटस्थापनेपासून विजयादशमीपर्यंत चालणाऱ्या या उत्सवात देवीची विधिवत प्राणप्रतिष्ठापना, राजोपचार पूजा, नित्य महाआरती, देवीचा गोंधळ जागर, श्री सप्तशती पाठवाचन, विविध धार्मिक अभिषेक, कुमारिका पूजन तसेच नवचंडी हवनाचे आयोजन करण्यात आले आहे. या महोत्सवाचे प्रमुख आकर्षण असणाऱ्या ‘नमो दांडिया’ स्पर्धेत सहभागी होणाऱ्या कलाकारांसाठी आकर्षक बक्षिसे ठेवण्यात आली असून, विजयादशमीच्या दिवशी अंतिम तीन विजेत्यांची निवड केली जाणार आहे. यामुळे पारंपरिक भक्तिभावासोबतच दांडियाच्या तालावर थिरकण्याची उत्तम संधी खेडकरांना उपलब्ध झाली आहे.
उत्सवाच्या सांगता टप्प्यात २० ऑक्टोबर रोजी दसऱ्याच्या शुभमुहूर्तावर भव्य दीपोत्सव आणि महाआरती संपन्न होणार आहे, तर २१ ऑक्टोबर रोजी उत्तरपूजा व श्री अंबाभवानी मातेच्या विसर्जन मिरवणुकीने या सोहळ्याची सांगता होईल. धार्मिक पावित्र्य, समृद्ध सांस्कृतिक परंपरा आणि दांडियाचा जल्लोष अशा चैतन्यमय वातावरणात रंगणाऱ्या या नवरात्रोत्सवात सर्व नागरिकांनी सहकुटुंब मोठ्या संख्येने सहभागी व्हावे, असे आग्रही आवाहन ॲड. वैभव खेडेकर यांनी केले आहे.
