खेड : तालुक्यातील जगबुडी नदीच्या पाण्याच्या पात्रात ८० वर्षीय महिलेचा मृतदेह आढळून आल्याने परिसरात खळबळ उडाली आहे. लक्ष्मी गोविंद भोसले (वय ८०, रा. महाडनाका, रत्नागिरी) असे मृत महिलेचे नाव असून, त्या १ नोव्हेंबरपासून बेपत्ता होत्या. अखेर ३ नोव्हेंबर रोजी गुलमोहर पार्क परिसरातील नदीपात्रात त्यांचा मृतदेह आढळून आला.
मिळालेल्या माहितीनुसार, लक्ष्मी भोसले या स्वतःच्या साड्या धुण्यासाठी घरातून बाहेर पडून जगबुडी नदीवर गेल्या होत्या. मात्र, सायंकाळी पाच वाजेपर्यंत त्या घरी परतल्या नाहीत. कुटुंबीयांनी त्यांचा सर्वत्र शोध घेतला, मात्र त्या कुठेही आढळून आल्या नाहीत. त्यामुळे अज्ञात व्यक्तीने त्यांना पळवून नेले असावे, अशी शक्यता व्यक्त करत १ नोव्हेंबर रोजी खेड पोलीस ठाण्यात अज्ञात व्यक्तीविरोधात तक्रार दाखल करण्यात आली होती.
दरम्यान, ३ नोव्हेंबर रोजी सकाळी नातेवाईक व संबंधितांकडून त्यांचा पुन्हा शोध घेतला जात असताना गुलमोहर पार्क येथील जगबुडी नदीच्या पाण्याच्या पात्रात त्या पालथ्या अवस्थेत मृतावस्थेत आढळून आल्या. मृतदेहातून दुर्गंधी येत असल्याचेही पोलिसांना दिलेल्या माहितीत नमूद करण्यात आले आहे.
या घटनेची खेड पोलीस ठाण्यात आकस्मिक मृत्यू म्हणून नोंद करण्यात आली असून, पुढील तपास पोलीस करीत आहेत.
