रत्नागिरी : रत्नागिरीच्या मातीची शान आंतरराष्ट्रीय स्तरावर उंचावत मुंबईतील भांडुप येथे राहणारा प्रतिभावान बालक खेळाडू रुद्र विजय महाले याने क्रीडा क्षेत्रात नवा इतिहास रचत ‘गिनीज वर्ल्ड रेकॉर्ड्स’मध्ये आपल्या कर्तृत्वाची सुवर्ण मोहर उमटवली आहे. कर्नाटक राज्यातील बेळगाव येथे ‘शिवागंगा आर. एस. सी. (इंडिया)’ यांच्या वतीने नुकत्याच आयोजित करण्यात आलेल्या अत्यंत चुरशीच्या व थरारक स्पर्धेत रुद्रने इनलाईन स्केट्सवर मागे चालत (बॅकवर्ड स्केटिंग) १०० मीटरचे अंतर अवघ्या १७.९३ सेकंदांत लीलया पार करण्याचा अंगावर काटा आणणारा पराक्रम करून दाखवला. लहान वयातच दाखवलेल्या या थक्क करणाऱ्या कामगिरीबद्दल रुद्रला गिनीज वर्ल्ड रेकॉर्ड्सचे मानाचे अधिकृत प्रमाणपत्र आणि पदक बहाल करण्यात आले असून, त्याच्या या देदिप्यमान यशामुळे रत्नागिरीकरांची मान जगभरात अभिमानाने उंचावली आहे.
रुद्रची नाळ कोकण आणि रत्नागिरीशी अत्यंत घट्ट जोडलेली असून तो रत्नागिरीतील निवृत्त पोलीस निरीक्षक अशोक विष्णू चव्हाण यांचा नातू आहे. त्याची आई सौ. संपदा अशोक चव्हाण (महाले) या रत्नागिरीच्या गोगटे-जोगळेकर महाविद्यालयाच्या माजी विद्यार्थिनी असून महाविद्यालयात असताना त्यांनी कला आणि क्रीडा क्षेत्रात मिळवलेला वारसा रुद्रला लाभला आहे. रुद्रचे वडील विजय महाले हे टाटा कन्सल्टन्सी सर्व्हिसेस (टीसीएस) मध्ये टेक्निकल लीड म्हणून कार्यरत आहेत, तर आई संपदा महाले महाराष्ट्र शासनाच्या सार्वजनिक बांधकाम विभागात वरिष्ठ लिपिक म्हणून सेवा बजावत आहेत. अत्यंत कठोर मेहनत, जिद्द आणि आत्मविश्वासाच्या जोरावर अवघ्या जगाचे लक्ष वेधून घेत रत्नागिरीचे नाव जागतिक नकाशावर कोरणाऱ्या या बालचमुवर सर्वच स्तरांतून कौतुकाचा वर्षाव होत असून भविष्यातही त्याने क्रीडा जगतात अशीच उत्तुंग भरारी घ्यावी, अशा सदिच्छा मित्रपरिवार, क्रीडाप्रेमी आणि नातेवाइकांकडून व्यक्त केल्या जात आहेत.
