पोलीस अधीक्षक नितीन बगाटे व अपर पोलीस अधीक्षक बी. बी. महामुनी यांच्या हस्ते विधी
रत्नागिरी: विजयादशमीच्या शुभमुहूर्तावर रत्नागिरी जिल्हा पोलीस मुख्यालयात दसरा सण मोठ्या उत्साहात साजरा करण्यात आला असून, या निमित्ताने शस्त्रागारातील विविध शस्त्रांचे पारंपरिक पद्धतीने विधिवत पूजन पार पडले. जिल्ह्याचे पोलीस अधीक्षक नितीन बगाटे (भा.पो.से.) तसेच अपर पोलीस अधीक्षक बी. बी. महामुनी यांच्या प्रमुख उपस्थितीत व शुभहस्ते हा पारंपरिक शस्त्रपूजन सोहळा अत्यंत शिस्तबद्ध वातावरणात संपन्न झाला.
या मंगलदिनी केवळ मुख्य शस्त्रागारातील शस्त्रांचीच नव्हे, तर पोलीस दलाच्या दैनंदिन कामकाजाशी व कर्तव्याशी निगडित असणाऱ्या विविध विभागांतील साहित्याचेही भक्तिभावाने पूजन करण्यात आले. यामध्ये पोलीस वाद्यवृंद विभागातील वाद्ये, पोलीस जवानांच्या तंदुरुस्तीसाठी असलेल्या रत्नागिरी पोलीस हेल्थ क्लबमधील व्यायाम साहित्य तसेच कायदा व सुव्यवस्थेच्या बंदोबस्तासाठी सज्ज असणाऱ्या मोटार परिवहन विभागातील वाहने व तांत्रिक साहित्याचा समावेश होता. दसऱ्याच्या पावन पर्वावर पार पडलेल्या या पारंपरिक पूजन सोहळ्यामुळे पोलीस दलातील अधिकारी व अंमलदारांमध्ये नवचैतन्य आणि उत्साहाचे वातावरण निर्माण झाले.
