रत्नागिरी: रत्नागिरीतील ऐतिहासिक मिरकरवाडा बंदरातील जेटीवर किरकोळ दुरुस्तीच्या नावाखाली येणाऱ्या बाहेरील राज्यातील अद्ययावत आणि मोठ्या मासेमारी नौका दिवस-दिवसभर ठाण मांडून जेटी अडवून ठेवत असल्याने स्थानिक मच्छिमारांमध्ये प्रचंड असंतोष खदखदत असून बंदरावर कमालीचे तणावपूर्ण वातावरण निर्माण झाले आहे. समुद्रातून मासेमारी करून मासळीसह बंदरात दाखल होणाऱ्या स्थानिक मच्छिमारांच्या नौकांना मासळी उतरवण्यासाठी जेटीवर जागाच शिल्लक राहत नसल्याने स्थानिक बांधवांची मोठी कोंडी होत आहे. मिरकरवाडा जेटीची प्रत्यक्ष क्षमता सुमारे ३०० नौका उभ्या करण्याची असताना सद्यस्थितीत ४५० ते ५०० नौकांची दैनंदिन वर्दळ सुरू असते; त्यातच एका नौकेच्या किरकोळ दुरुस्तीच्या नावाखाली इतर तीन ते चार अवाढव्य परप्रांतीय नौका सोबत आणून त्या जेटीवर उभ्या केल्या जात असल्याने स्थानिक बोटींना ये-जा करण्यासाठी रस्ताच शिल्लक राहत नाही. या वाढत्या मनमानीमुळे अखेर स्थानिक मच्छिमार नेते नुरुद्दीन पटेल आणि बिलाल सोलकर यांनी सोमवारी सहाय्यक मत्स्यव्यवसाय आयुक्त जे. डी. सावंत यांची प्रत्यक्ष भेट घेऊन या गंभीर समस्येकडे लक्ष वेधत तीव्र तक्रार नोंदवली.
यावेळी स्थानिक मच्छिमार नेत्यांनी या परप्रांतीय नौकांना मिऱ्या बंदर अथवा भगवती बंदर येथे हलवण्याची आग्रही मागणी केली. त्यावर नियमांनुसार आश्रयासाठी किंवा दुरुस्तीसाठी राज्याबाहेरून येणाऱ्या नौकांना जेटीवर येण्यास थेट मज्जाव करता येत नाही, अशी प्रशासकीय वस्तुस्थिती स्पष्ट करत सहाय्यक आयुक्त जे. डी. सावंत यांनी सुरक्षा रक्षकांना कडक निर्देश दिले. दुरुस्तीसाठी दाखल झालेल्या या परप्रांतीय नौकांची दुरुस्ती पूर्ण होताच त्या तातडीने जेटीवरून हटवून जागा मोकळी करण्याची धडक कार्यवाही करावी, अशा स्पष्ट सूचना त्यांनी सुरक्षा यंत्रणेला दिल्या.
दरम्यान, प्रशासकीय पातळीवर सुरक्षा रक्षकांकडून माहिती घेतली असता, काही स्थानिक मच्छिमारच या परप्रांतीय नौका आपल्या असल्याचे भासवून त्यांना मदत करत असल्याचे धक्कादायक वास्तव समोर आले आहे. या संपूर्ण प्रकाराची आणि जेटीवरील वाढत्या तणावाची गंभीर दखल घेत सहाय्यक आयुक्त सावंत यांनी बंदर विभागाच्या वरिष्ठ अधिकाऱ्यांनाही दूरध्वनीवरून सविस्तर माहिती दिली. जेटीवर दिवसभर अडकून पडणाऱ्या या परप्रांतीय नौकांमुळे स्थानिक मच्छिमारांची होणारी गैरसोय आणि त्यातून उद्भवू शकणारा संघर्ष टाळण्यासाठी प्रशासनाने आता बंदरावर चोख दक्षता बाळगण्यास सुरुवात केली आहे.
