रत्नागिरी (वैभव पवार): पंतप्रधानांच्या महत्त्वाकांक्षी दहा हजार शेतकरी उत्पादक कंपन्यांच्या (10k प्रकल्प) संकल्पनेतून आणि ‘उमेद’ महाराष्ट्र राज्य ग्रामीण जीवनोन्नती अभियानाच्या मार्गदर्शनाखाली आकारास आलेल्या तालुक्यातील एकमेव ‘जॅकप्रो महिला फार्मर प्रोड्युसर कंपनी’ने आपल्या कर्तृत्वाचा नवा अध्याय लिहिला आहे. कोकणातील शेतकरी कुटुंबांतील सुमारे साडेसातशे महिला सभासदांच्या या कंपनीने पारंपरिक उत्पादनांपलीकडे जाऊन तयार केलेल्या रुचकर दिवाळी फराळाने आता थेट पश्चिम बंगालमधील घराघरांपर्यंत मजल मारली आहे. आंबा, काजू, फणस, कोकम, करवंद आणि जांभूळ यांसारख्या हंगामी फळांच्या उत्पन्नाचा जानेवारी ते मे हा मुख्य काळ संपल्यानंतर सप्टेंबर ते डिसेंबर दरम्यान निर्माण होणाऱ्या रोजगाराच्या पोकळीवर कंपनीने सणासुदीच्या माध्यमातून मात केली आहे.
रत्नागिरी जिल्हा परिषदेजवळील संकेश्वर पार्क येथील ‘महिला किसान मार्ट’ आउटलेटच्या माध्यमातून वर्षभर उप-उत्पादने आणि प्रत्यक्ष फळांची विक्री करणाऱ्या या कंपनीने यंदाच्या गणेशोत्सव व दिवाळी सणाचे औचित्य साधून ‘दिवाळी फराळ किट’ आणि ‘अभ्यंग स्नान दिवाळी सुगंधी किट’ हा नाविन्यपूर्ण उपक्रम हाती घेतला. या उपक्रमामुळे कोतवडे जिल्हा परिषद गटासह ओरी आणि नेवरे भागातील तब्बल ५० महिलांना थेट रोजगाराची नवी संधी उपलब्ध झाली. महिलांनी पारंपरिक कौशल्याने बनवलेला हा फराळ अत्यंत चविष्ट आणि दर्जेदार ठरल्यामुळे स्थानिक स्तरावरून त्याला मिळालेली मागणी पुढे मुंबई आणि पुण्यातून विस्तारत थेट पश्चिम बंगालपर्यंत पोहोचली.
कंपनीच्या चेअरमन सौ. स्वरा वैभव देसाई, सेक्रेटरी हेमलता केशव गिडये, संचालिका शरयू संदीप देसाई, ज्योती मोरे, समृद्धी सोनार, भक्ती मोरे, रवीना कदम, निशिगंधा कोसुम्बकर यांच्या नेतृत्वाखाली, तसेच सीईओ सार्थक अजित कदम आणि अकौंटंट सायली चंद्रकांत पवार यांच्या व्यवस्थापनातून ही व्यावसायिक झेप शक्य झाली. याशिवाय पदार्थ निर्मिती, दर्जेदार पॅकेजिंग आणि विक्री व्यवस्थापनात वेदा विवेक देसाई व अमिता अमित देसाई यांचे मोलाचे योगदान लाभले. शेतकरी महिलांच्या श्रमाला सन्मान, मालाला योग्य भाव आणि शाश्वत बाजारपेठ मिळवून देण्याचे मूळ ध्येय या यशस्वी उपक्रमातून प्रत्यक्षात उतरल्याचे कंपनीच्या व्यवस्थापनाकडून सांगण्यात आले.
