इचलकरंजी : कौटुंबिक वादातून पत्नीने झोपेत असलेल्या पतीच्या डोक्यात खलबत्ता घालून त्याची हत्या केल्याची धक्कादायक घटना इचलकरंजीतील गावभाग परिसरात उघडकीस आली. सागर दीपक बुरसे (वय ३५, रा. त्रिशूल चौक, गावभाग) असे मृत पतीचे नाव आहे. या घटनेनंतर पत्नी वैशाली हिने मुलीला सोबत घेत पोलीस ठाणे गाठले आणि पतीचा खून केल्याची कबुली दिल्याची माहिती समोर आली आहे. या घटनेमुळे शहरात खळबळ उडाली आहे.
सागर बुरसे हे इचलकरंजी महापालिकेच्या पाणीपुरवठा विभागात कर्मचारी म्हणून कार्यरत होते. सागर आणि वैशाली यांच्यात कौटुंबिक कारणांवरून वारंवार वाद होत असल्याचे समजते. या वादातून काही वर्षांपूर्वी दोघे विभक्त झाले होते. मात्र, गेल्या काही महिन्यांपासून ते पुन्हा एकत्र राहू लागले होते. संसार पुन्हा सुरू झाल्यानंतरही त्यांच्यातील वाद थांबले नव्हते.
घटनेच्या दिवशी पहाटे चारच्या सुमारास दोघांमध्ये पुन्हा वाद झाल्याचे सांगण्यात येते. त्यानंतर दोघेही झोपी गेले. मात्र, झोपेत असलेल्या सागर यांच्या डोक्यात वैशाली हिने खलबत्ता घातल्याने त्यांचा मृत्यू झाला. सकाळी उठल्यानंतर वैशाली हिने नेहमीची कामे आटोपली. त्यानंतर वडील आणि भावाला घडलेल्या प्रकाराची माहिती दिली. पुढे भावासह मुलीला घेऊन तिने पोलीस ठाणे गाठले आणि पतीची हत्या केल्याची कबुली दिली.
घटनेची माहिती मिळताच गावभाग पोलीस ठाण्याचे निरीक्षक महेश चव्हाण यांच्यासह पोलीस पथकाने घटनास्थळी धाव घेतली. पोलिसांनी घटनास्थळाची पाहणी करून वैशाली हिला ताब्यात घेतले. सागर यांचा मृतदेह पाहताच त्यांच्या आई, बहिणी आणि अन्य नातेवाइकांनी केलेला आक्रोश हृदय पिळवटून टाकणारा होता. घटनेची माहिती परिसरात पसरताच घटनास्थळी नागरिकांची मोठी गर्दी झाली. या प्रकरणी पोलीस पुढील तपास करत आहेत.
