आज शिवाजी पार्कवर धडकणार जनआक्रोश, आदित्य-अमित ठाकरेंचा थेट इशारा
मुंबई: राजधानी मुंबईत पेटलेला आंदोलनाचा वणवा आता अधिकच भडकला असून मुख्य निवडणूक आयुक्त ज्ञानेश कुमार यांच्या कारभाराविरोधात आज, सोमवार १२ ऑक्टोबर रोजी ऐतिहासिक शिवाजी पार्कवर रणशिंग फुंकले जाणार आहे. कॉकरोच जनता पार्टी (सीजेपी) आणि विरोधकांच्या आंदोलनादरम्यान पोलिसांनी ताब्यात घेतलेल्या सर्व शिवसैनिक व आंदोलकांची बिनशर्त सुटका झाल्यानंतर ठाकरे बंधूंनी सरकारविरोधात थेट आरपारच्या लढ्याची घोषणा केली आहे. शिवसेना (उद्धव बाळासाहेब ठाकरे) पक्षाचे नेते आदित्य ठाकरे यांनी मुंबई पोलिसांशी प्रदीर्घ चर्चा करून ताब्यात घेतलेल्या आंदोलकांची सुटका झाल्याचे स्पष्ट केले असले, तरी निवडणूक आयोगाच्या दडपशाहीविरोधातील संघर्ष थांबणार नसून आजपासून हा लढा अधिक तीव्र केला जाईल, असा सडेतोड इशारा दिला आहे. त्याच वेळी अमित ठाकरे यांनीही मैदानात उतरत आजपासून शिवाजी पार्कवर तीव्र आंदोलन छेडण्याचा निर्धार व्यक्त केल्याने राजकीय वातावरण पूर्णपणे तापले आहे.
शिवाजी पार्क परिसरात शांततापूर्ण मार्गाने आंदोलन करणाऱ्या कार्यकर्त्यांना पोलिसांनी बळाचा वापर करून ताब्यात घेतल्यानंतर शिवसेना भवन परिसरात मोठा तणाव निर्माण झाला होता. या पोलिसी कारवाईच्या निषेधार्थ आदित्य ठाकरे आणि तेजस ठाकरे यांनी स्वतः रस्त्यावर उतरून प्रशासकीय दडपशाहीवर तीव्र संताप व्यक्त केला होता. आंदोलकांची सुटका झाल्यानंतर माध्यमांशी बोलताना आदित्य ठाकरे यांनी केंद्र सरकारवर घणाघाती हल्ला चढवला. देशातील जनतेचा आवाज दाबण्याचा प्रयत्न करणाऱ्या केंद्र सरकारच्या इशाऱ्यावर मुंबईत आंदोलकांना लक्ष्य केले जात असल्याचा गंभीर आरोप त्यांनी केला. मुंबईत दिल्लीसारखी हुकूमशाही अजिबात खपवून घेतली जाणार नाही आणि आंदोलन चिरडण्याचा प्रयत्न केल्यास त्याचा उद्रेक होईल, असा इशारा देत त्यांनी आंदोलनात सहभागी होणाऱ्या प्रत्येकाची सुरक्षा राखणे ही आपली बांधिलकी असल्याचे स्पष्ट केले.
दुसरीकडे, कार्यकर्त्यांच्या सुटकेसाठी तत्काळ घटनास्थळी धाव घेणाऱ्या अमित ठाकरे यांनीही आक्रमक भूमिका मांडत आंदोलनाचा पुढचा टप्पा जाहीर केला. पोलिसांनी डांबून ठेवलेल्या सहकाऱ्यांना सोडवण्यात यश आल्याचे सांगत, ज्ञानेश कुमार यांच्या मनमानी कारभाराविरोधात आजपासून शिवाजी पार्कच्या मैदानात तीव्र आंदोलन सुरू करण्यात येईल, अशी गर्जना त्यांनी केली. एकाच दिवशी आदित्य ठाकरे आणि अमित ठाकरे यांनी रस्त्यावर उतरून आंदोलनाचा आक्रमक पवित्रा घेतल्यामुळे मुंबईत सत्ताधारी आणि विरोधकांमध्ये मोठा संघर्ष पेटण्याची चिन्हे असून या लढ्याकडे संपूर्ण राज्याचे लक्ष लागले आहे.
