तासगाव: शाळा सुटल्यानंतर पत्नीला घरी आणण्यासाठी तीन वर्षांच्या चिमुरडीला सोबत घेऊन निघालेल्या कुटुंबावर वाटेतच काळाने भीषण घाला घातला असून, तासगाव-मणेराजुरी रस्त्यावर उभ्या असलेल्या एका पिकअप वाहनाला दुचाकीने जोरदार धडक दिल्याने झालेल्या भीषण अपघातात पित्यासह अवघ्या तीन वर्षांच्या बालिकेचा जागीच दुर्दैवी अंत झाला. या काळजाचा ठोका चुकवणाऱ्या अपघातात मृताची पत्नी गंभीर जखमी झाली असून, तिच्यावर सध्या रुग्णालयात उपचार सुरू आहेत. एकाच कुटुंबातील बाप-लेकीचा अशा प्रकारे अपघाती मृत्यू झाल्याने संपूर्ण चिंचणी, वासुंबे तसेच तासगाव परिसरात तीव्र हळहळ आणि शोककळा पसरली आहे.
मिळालेल्या प्राथमिक माहितीनुसार, चिंचणी येथील मूळ रहिवासी आणि सध्या वासुंबे येथे वास्तव्यास असलेले अंधश्रद्धा निर्मूलन समितीचे बाबुराव जाधव यांचे सुपुत्र सागर जाधव (वय ३८) हे पत्नी सोनाली जाधव यांना आणण्यासाठी दुचाकीवरून (क्रमांक एमएच १० सीएफ ३८६४) घराबाहेर पडले होते. पत्नी ज्या शाळेत कार्यरत होत्या, ती शाळा घरापासून अवघ्या काही मिनिटांच्या अंतरावर तासगाव-मणेराजुरी रस्त्यावर आहे. सागर जाधव हे आपली तीन वर्षांची लाडकी मुलगी हर्षिता हिलाही सोबत घेऊन गेले होते. शाळा सुटल्यानंतर पत्नीला दुचाकीवर सोबत घेऊन हे तिघेही हसतमुखाने घराच्या दिशेने परतत होते. अवघ्या काही मिनिटांत ते घरापर्यंत पोहोचणार होते, तितक्यात रस्त्याच्या कडेला उभ्या असलेल्या एका पिकअप वाहनाला (क्रमांक एमएच ०९ सीए ९४७८) त्यांच्या दुचाकीची अत्यंत जोरदार धडक बसली.
ही धडक इतकी भीषण होती की दुचाकीवरील तिघेही रस्त्यावर फेकले जाऊन गंभीर जखमी झाले. अपघाताचा कानठळ्या बसवणारा आवाज होताच परिसरातील नागरिकांनी तत्काळ घटनास्थळी धाव घेतली; मात्र तोपर्यंत सागर जाधव आणि त्यांची निष्पाप मुलगी हर्षिता यांचा दुर्दैवी मृत्यू झाला होता. गंभीर जखमी झालेल्या सोनाली जाधव यांना तातडीने रुग्णालयात दाखल करण्यात आले असून, तिथे त्यांच्यावर वैद्यकीय उपचार सुरू आहेत. अवघ्या काही मिनिटांच्या अंतरावर घर असतानाच घराचा उंबरा गाठण्याआधी घडलेल्या या भीषण अनर्थामुळे जाधव कुटुंबावर आभाळच कोसळले असून, चिमुकल्या हर्षिताच्या अशा अकाली जाण्याने संपूर्ण पंचक्रोशीत हळहळ व्यक्त होत आहे.
