आरवली (योगेश चव्हाण): चिपळूण तालुक्यातील राजकीय समीकरणांमध्ये मोठी उलथापालथ घडवत राष्ट्रवादी काँग्रेस आणि भारतीय जनता पक्षाच्या असंख्य कार्यकर्त्यांनी महाराष्ट्र नवनिर्माण सेनेचा झेंडा हाती घेतला आहे. शहरातील हॉटेल साईशा येथे मनसे जिल्हाध्यक्ष जितेंद्र चव्हाण यांच्या प्रमुख उपस्थितीत हा भव्य पक्षप्रवेश सोहळा मोठ्या उत्साहात पार पडला. तालुक्यातील दळवटणे, वालोपे, निरबाडे आणि वालोटी या भागांतील दोन्ही प्रमुख पक्षांच्या कार्यकर्त्यांनी मनसेमध्ये जाहीर प्रवेश केल्याने चिपळूण परिसरातील राजकीय वर्तुळात चांगलीच खळबळ उडाली आहे.
कार्यक्रमाचा प्रारंभ छत्रपती शिवाजी महाराजांच्या प्रतिमेला पुष्पहार अर्पण करून अभिवादनाने करण्यात आला. यानंतर रीतसर पक्षप्रवेश पार पडताच उपस्थित कार्यकर्त्यांना कीर्तनकार ह.भ.प. तांबिटकर महाराज तसेच प्राध्यापक टेरवकर यांच्यासह प्रमुख मनसे पदाधिकाऱ्यांनी मार्गदर्शन केले. याप्रसंगी मार्गदर्शन करताना जिल्हाध्यक्ष जितेंद्र चव्हाण यांनी नव्या प्रवेशकर्त्यांचे मनसे परिवारात स्वागत करत त्यांना संघटनेकडून सर्वतोपरी सहकार्य आणि पाठबळ देण्याची ग्वाही दिली.
सोहळ्याचे नेटके सूत्रसंचलन आणि आभार प्रदर्शन ज्येष्ठ निवेदक शहीदभाई खेरटकर यांनी केले. या राजकीय मेळाव्यास माथाडी कामगार सेनेचे सरचिटणीस रविकांत काणेकर, शेतकरी सेनेचे जिल्हा सचिव जितेंद्र महाडिक, गुहागर तालुकाध्यक्ष सुनील हळदणकर, वाहतूक सेनेचे तालुकाध्यक्ष मिलिंद कदम, माजी तालुका प्रवक्ते संदेश साळवी आणि महिला उपाध्यक्षा स्मिता पावसकर यांच्यासह अनेक पदाधिकारी व कार्यकर्ते मोठ्या संख्येने उपस्थित होते. अखेर राष्ट्रगीताने या उत्साही पक्षप्रवेश सोहळ्याची सांगता करण्यात आली.
