गणपतीपुळे / वैभव पवार: जागतिक कीर्तीचे पर्यटन केंद्र आणि लाखो भाविकांचे श्रद्धास्थान असलेले श्री क्षेत्र गणपतीपुळे आगामी दिवाळी पर्यटन हंगामाच्या पार्श्वभूमीवर देश-विदेशातील पर्यटकांच्या स्वागतासाठी सज्ज झाले आहे. शाळा आणि महाविद्यालयांच्या दिवाळी सुट्ट्यांमुळे दरवर्षीप्रमाणे यंदाही येथे पर्यटकांचा मोठा ओघ वाढण्याची शक्यता असल्याने परिसरातील सर्वच लहान-मोठ्या पर्यटन व्यावसायिकांची जोरदार लगबग सुरू झाली आहे. पर्यटकांना दर्जेदार सुविधा देण्यासाठी स्थानिक हॉटेल्स, रिसॉर्ट्स आणि लॉजिंग व्यावसायिकांनी आकर्षक रंगरंगोटी व परिसराच्या सुशोभीकरणावर भर दिला असून, सध्या विविध ठिकाणांहून खोल्यांच्या आगाऊ आरक्षणाला (ॲडव्हान्स बुकिंग) मोठा प्रतिसाद मिळत असल्याचे दिसून येत आहे.
खाजगी निवासस्थानांप्रमाणेच महाराष्ट्र पर्यटन विकास महामंडळाच्या (एमटीडीसी) येथील पर्यटन निवासालाही पर्यटकांची पहिली पसंती लाभत असून, यंदाच्या सुट्ट्यांसाठी शासकीय रिसॉर्टचे आरक्षणही वेगाने सुरू झाले आहे. पर्यटनाबरोबरच येथील प्रसिद्ध स्वयंभू श्री गणेशाच्या दर्शनासाठी दररोज हजारो भाविक दाखल होत असल्याने, मंदिरात गर्दीचे योग्य व्यवस्थापन व्हावे आणि सर्वांना सुलभतेने दर्शन घेता यावे यासाठी ‘संस्थान श्री देव गणपतीपुळे’च्या वतीने चोख नियोजन करण्यात आले आहे. भाविकांच्या रांगांचे व्यवस्थापन, पिण्याचे पाणी आणि सुरक्षेच्या दृष्टीने आवश्यक ती सर्व काळजी देवस्थान प्रशासनाकडून घेण्यात येत आहे.
समुद्रकिनाऱ्यावरील पर्यटनाला अधिक रंगत आणण्यासाठी उंट-घोडेस्वार, एटीव्ही बाईक चालक, छायाचित्रकार, तसेच शहाळी, सरबत आणि विविध खाद्यपदार्थ विक्रेते पर्यटकांच्या सेवेसाठी सज्ज झाले आहेत. इतर पर्यटनस्थळांच्या तुलनेत कोकणातील निसर्गसौंदर्य आणि धार्मिक पावित्र्याचा संगम असलेल्या गणपतीपुळे परिसराला पर्यटकांची नेहमीच विशेष पसंती मिळत असल्याने यंदाचा हंगामही अत्यंत भरभराटीचा ठरेल, असा विश्वास व्यक्त केला जात आहे. आगंतुक पर्यटकांची कोणतीही गैरसोय होऊ नये या उद्देशाने संपूर्ण पर्यटननगरी सज्ज झाली असून, अवघ्या काही दिवसांत गणपतीपुळे परिसर पर्यटकांच्या अलोट गर्दीने आणि उत्साहाने गजबजून निघणार असल्याचे चित्र स्पष्ट दिसत आहे.
