शालेय अन्नात चायनीज भेळ; अन्नघोटाळ्याप्रकरणी तुकाराम मुंडे यांच्याकडे पाठपुरावा
रत्नागिरी: महसूल विभागाशी संबंधित जनतेच्या विविध प्रलंबित समस्यांबाबत युवा क्रांती सेनेच्या वतीने राज्याचे महसूल मंत्री बावनकुळे रत्नागिरी दौऱ्यावर आले असता, त्यांना संपूर्ण महाराष्ट्रातील प्रश्नांवर सविस्तर निवेदन सादर करण्यात आले होते. या निवेदनाची महसूल मंत्र्यांनी अत्यंत गांभीर्याने दखल घेतली असून, त्यावर योग्य ती कार्यवाही करण्याचे सकारात्मक उत्तर प्रशासनाकडून प्राप्त झाले आहे. महसूल मंत्र्यांनी यासंदर्भात रत्नागिरीच्या जिल्हाधिकाऱ्यांना तत्काळ आवश्यक ती पावले उचलून सर्व प्रलंबित विषय मार्गी लावण्याचे स्पष्ट निर्देश दिले आहेत. या अधिकृत पत्राची प्रत युवा क्रांती सेनेच्या वतीने आयोजित पत्रकार परिषदेत प्रसिद्धी माध्यमांना दाखवण्यात आली. यावेळी संघटनेचे कार्याध्यक्ष सचिन शिंदे यांनी महसूल विभागाशी संबंधित विविध प्रश्नांवर सविस्तर माहिती दिली.
या निवेदनामध्ये प्रामुख्याने रेशन दुकान, भूमी अभिलेख विभाग, कंत्राटी कामगार आणि रेशन कार्ड संदर्भातील अडचणींवर भर देण्यात आला होता. रेशन कार्डवर नमूद करण्यात येणाऱ्या वार्षिक उत्पन्नाच्या मर्यादेबाबत बोलताना, सध्या शहरी भागाकरिता ६० हजार रुपयांची मर्यादा निश्चित करण्यात आल्याचे सांगत या व इतर मागण्यांवर शासन स्तरावरून सकारात्मक पावले उचलली जात असल्याचे स्पष्ट करण्यात आले.
दुसऱ्या बाजूला रत्नागिरीमध्ये अन्नघोटाळ्याचा प्रश्न अतिशय गंभीर स्वरूपाचा बनला असल्याचा आरोप यावेळी करण्यात आला. या संपूर्ण प्रकरणासंदर्भात वरिष्ठ अधिकारी तुकाराम मुंडे यांच्याशी सातत्याने पत्रव्यवहार सुरू असून, त्यांनी यावर योग्य तो पाठपुरावा केला आहे. शालेय पाल्यांना शाळांमध्ये जे खाद्यान्न दिले जाते, त्यात चायनीज भेळसारखे अयोग्य आणि निकृष्ट अन्न दिले जात असल्याचे पुराव्यानिशी उघड झाले आहे. मात्र, सर्व पुराव्यांसह संबंधित यंत्रणेला माहिती दिल्यानंतर तातडीने धाड टाकून कारवाई होणे गरजेचे असताना, वरिष्ठ अधिकाऱ्यांच्या आदेशानुसार किंवा फोनवरून कारवाईचे निर्देश मिळण्यापूर्वीच ती संशयास्पद ठिकाणे बंद केली जातात, ही अत्यंत दुर्दैवाची बाब असल्याचे पत्रकार परिषदेत नमूद करण्यात आले. या गंभीर गैरप्रकाराबाबत पुन्हा एकदा तुकाराम मुंडे यांच्याकडे पत्रव्यवहार करण्यात आला असून, लवकरच रत्नागिरीच्या अन्नविशोषक कार्यालयातून यावर अधिकृत पत्र आणि कारवाईची दिशा स्पष्ट होईल, असा विश्वास व्यक्त करण्यात आला.
दरम्यान, फेरीवाले आणि हातावर पोट असणाऱ्या घटकांसाठी जाहीर करण्यात आलेल्या नगर परिषदेच्या हॉकर्स झोनच्या कामाची सद्यस्थिती काय आहे, याचा स्पष्ट खुलासा प्रशासनाने सार्वजनिक सभा किंवा पत्रकार परिषदेच्या माध्यमातून करावा, अशी जोरदार मागणी करण्यात आली. हॉकर्स झोन संदर्भात नेमकी काय कारवाई सुरू आहे, सर्वेक्षणाचे काम कुठपर्यंत आले आहे आणि गरजू लोकांना याचा लाभ कधी व कसा मिळणार, याबाबत स्पष्टता असणे गरजेचे असून प्रशासनाने दिलेली आश्वासने कधी पूर्ण होणार, याविषयीची वस्तुस्थिती जनतेसमोर आणली पाहिजे, असे यावेळी सांगण्यात आले. यासोबतच एमआयडीसी क्षेत्रातील वाढत्या प्रदूषणाचा मुद्दाही उपस्थित करत, यासंदर्भात प्रशासकीय स्तरावर आणि पंकजा मुंडे यांच्याकडे पाठपुरावा करण्यात आला असून प्रदूषणाविरुद्ध लवकरात लवकर ठोस उपाययोजना करावी, अशी मागणी करण्यात आली आहे.
