रत्नागिरी : वाढत्या उन्हाळ्याच्या तीव्रतेत पाणीसंकटाची चाहूल लागत असतानाच रत्नागिरीतील मिरजोळे आणि उद्यमनगर औद्योगिक क्षेत्रासह लगतच्या ग्रामपंचायतींसाठी अत्यंत दिलासादायक वृत्त समोर आले आहे. लांजा व रत्नागिरी तालुक्यातून वाहणाऱ्या काजळी नदीवरील पाच प्रमुख धरणांमध्ये सध्या मुबलक पाणीसाठा उपलब्ध असून आगामी मे ते जून महिन्यापर्यंत उद्योग आणि नागरिकांना पाणीटंचाईची झळ बसू नये, या दृष्टीने महाराष्ट्र औद्योगिक विकास महामंडळाच्या (एमआयडीसी) प्रशासनाने चोख नियोजन आखले आहे.
काजळी नदीपात्रात एमआयडीसीच्या वतीने घाटीवळे, अंजणारी, असोडे, निवसर आणि हरचेरी या पाच ठिकाणी छोटी धरणे उभारण्यात आली आहेत. या सर्व जलप्रकल्पांची मिळून एकूण साठवण क्षमता २५.३७ लाख क्युबिक मीटर (घनमीटर) आहे. नुकत्याच झालेल्या कामांमुळे हरचेरी येथे जुन्या धरणाखाली नवीन बंधारा बांधण्यात आला असून, असोडे येथील धरणाचे कामही नव्याने पूर्ण करण्यात आले आहे. या सुधारणांमुळे परिसरातील एकूण पाणीसाठ्यात लक्षणीय भर पडली आहे. पावसाळा संपल्यानंतर वाहून जाणारे पाणी कार्यक्षमतेने अडवण्यासाठी एमआयडीसीकडून दरवर्षी या धरणांवर प्लेट आणि माती टाकून साठवण क्षमता वाढवली जाते. या वाढीव साठ्यासाठी तसेच पुढील पाच ते सहा महिने जलसाठ्याच्या देखरेखीसाठी सुरक्षारक्षक तैनात करण्याकामी प्रशासनाकडून सुमारे १७ ते १८ लाख रुपयांचा वार्षिक खर्च केला जातो.
पाच धरणांमधील एकूण २५.३७ लाख क्युबिक मीटर साठ्यापैकी मृत साठा (डेड स्टोरेज) वगळता २२.७७२ लाख क्युबिक मीटर पाणी थेट दैनंदिन व औद्योगिक वापरासाठी उपलब्ध झाले आहे. धरणनिहाय स्थिती पाहता, अंजणारी धरणामध्ये सर्वाधिक म्हणजे ७.४४ लाख क्युबिक मीटर साठा जमा आहे. त्याखालोखाल हरचेरीमध्ये ६.६६ लाख, घाटीवळेमध्ये ३.२६२ लाख, निवसरमध्ये २.७१ लाख आणि असोडे धरणामध्ये २.७ लाख क्युबिक मीटर पाणी उपलब्ध आहे. काही दिवसांपूर्वी पडलेल्या अवकाळी पावसामुळे घाटीवळे धरण पूर्णक्षमतेने भरले आहे, तर असोडे व अंजणारी धरणांतील पाणीपातळीत दरवर्षीच्या तुलनेत काहीशी घट नोंदवण्यात आली असली, तरी उपलब्ध साठ्याच्या काटेकोर व्यवस्थापनामुळे मे अखेरीपर्यंत पाणीटंचाई जाणवू दिली जाणार नाही, असा ठाम विश्वास एमआयडीसी प्रशासनाने व्यक्त केला आहे.
