अहिल्यानगर : दिवाळीचा आनंद साजरा करण्यासाठी, घरातील माणसांसाठी खरेदी करण्याच्या उत्साहात घराबाहेर पडलेले तीन तरुण पुन्हा कधीच परतणार नाहीत, याची कल्पनाही त्यांच्या कुटुंबीयांनी केली नव्हती. सणाच्या आनंदाची स्वप्ने घेऊन निघालेल्या या तिघांचा प्रवास रस्त्यातच काळाने संपवला. अहिल्यानगर जिल्ह्यातील शेवगाव-पैठण मार्गावर शुक्रवारी सायंकाळी घडलेल्या भीषण अपघातात ऊसाच्या भरधाव ट्रकने दुचाकीला दिलेल्या जोरदार धडकेत तीन तरुणांचा जागीच मृत्यू झाला. या हृदयद्रावक घटनेने खानपूर गावासह परिसरावर दुःखाचा डोंगर कोसळला आहे.
मिळालेल्या माहितीनुसार, खानपूर येथील ओंकार जगधने, अमर जगधने आणि रोहित धनुरे हे तिघेही दिवाळीच्या खरेदीसाठी दुचाकीवरून शेवगावच्या दिशेने निघाले होते. शुक्रवारी सायंकाळी साडेसहा वाजण्याच्या सुमारास त्यांची दुचाकी घोटण गावाजवळ आली असता हा भीषण अपघात घडला. यावेळी एका वाहनाला ओव्हरटेक करण्याच्या प्रयत्नात असलेल्या ऊसाच्या ट्रकचालकाचे वाहनावरील नियंत्रण सुटल्याने ट्रकची दुचाकीला जोरदार धडक बसली. धडकेची तीव्रता इतकी भीषण होती की दुचाकीचा अक्षरशः चेंदामेंदा झाला आणि तिघांनाही जीव गमवावा लागला.
या दुर्घटनेत मृत्युमुखी पडलेल्यांमध्ये १९ वर्षीय तरुणासह दोन अल्पवयीन मुलांचा समावेश असल्याची माहिती समोर आली आहे. तिघेही एकाच गावातील असल्याने या घटनेचे दुःख अधिक गडद झाले आहे. दिवाळीच्या पार्श्वभूमीवर घरात आनंदाचे वातावरण असताना अचानक आलेल्या मृत्यूच्या बातमीने कुटुंबीयांवर दुःखाचा आभाळ कोसळले. ज्या घरांमध्ये सणाची तयारी सुरू होती, त्याच घरांमध्ये आता शोकाकुल वातावरण पसरले आहे.
अपघाताची माहिती मिळताच परिसरातील नागरिकांनी घटनास्थळी धाव घेतली. पोलिसांनीही तातडीने घटनास्थळी पोहोचून पंचनामा केला असून, या प्रकरणी पुढील कायदेशीर कार्यवाही सुरू आहे. दिवाळीच्या खरेदीसाठी बाहेर पडलेल्या तीन तरुणांचा असा दुर्दैवी अंत झाल्याने खानपूर गाव सुन्न झाले असून, या घटनेने संपूर्ण परिसरातून हळहळ व्यक्त होत आहे.
