जयगड : सामाजिक कार्यातील सक्रिय योगदान, सर्वसामान्य नागरिकांच्या प्रश्नांबाबत असलेली आस्था आणि जनहितासाठी सातत्याने केलेल्या प्रयत्नांची दखल घेत युवा सेना विभाग समन्वयक (वाटद) तौसीफ अब्दुल रहीम पांजरी यांची विशेष कार्यकारी अधिकारी, रत्नागिरी या पदावर नियुक्ती करण्यात आली आहे. या नियुक्तीमुळे त्यांच्या सामाजिक आणि राजकीय वाटचालीत आणखी एक महत्त्वाचा टप्पा जोडला गेला असून जयगड-वाटद परिसरातून त्यांच्यावर अभिनंदनाचा वर्षाव होत आहे.
गेल्या अनेक वर्षांपासून तौसीफ पांजरी यांनी सामाजिक क्षेत्रात विविध उपक्रमांच्या माध्यमातून आपला सहभाग नोंदवला आहे. सर्वसामान्य नागरिकांच्या अडीअडचणी जाणून घेऊन त्यांना सहकार्य करणे, शैक्षणिक आणि सामाजिक उपक्रमांना हातभार लावणे, तसेच गरजूंच्या मदतीसाठी तत्पर राहणे, अशा कार्यातून त्यांनी परिसरातील नागरिकांशी विश्वासाचे संबंध निर्माण केले आहेत. केवळ राजकीय सक्रियतेपुरते मर्यादित न राहता समाजातील विविध घटकांशी जोडून राहण्याची त्यांची भूमिका या नियुक्तीमागील महत्त्वाची जमेची बाजू मानली जात आहे.
महाराष्ट्र राज्याचे उद्योगमंत्री उदय सामंत आणि राजापूर-लांजा विधानसभा मतदारसंघाचे आमदार किरण ऊर्फ भैय्या सामंत यांच्या मार्गदर्शनाखाली तौसीफ पांजरी यांचा राजकीय व सामाजिक प्रवास सुरू आहे. वरिष्ठ नेतृत्वाशी गेल्या २५ वर्षांपासून असलेले संबंध, पक्षकार्याप्रती निष्ठा आणि सामाजिक क्षेत्रातील सातत्यपूर्ण योगदान यामुळे त्यांच्यावर ही नवीन जबाबदारी सोपविण्यात आली आहे.
नियुक्तीनंतर प्रतिक्रिया व्यक्त करताना तौसीफ पांजरी यांनी आपल्या भावना व्यक्त केल्या. ते म्हणाले की, आयुष्यात पदे आणि जबाबदाऱ्या बदलत असतात; मात्र अनेक वर्षांपासून लाभलेली वरिष्ठांची साथ, मार्गदर्शन आणि आशीर्वाद हेच आपल्यासाठी खऱ्या अर्थाने मोलाचे आहेत. पदापेक्षा माणसांशी जपलेली नाती आणि विश्वास अधिक महत्त्वाचा असून योग्य वेळी मिळणारी माणसांची साथ हीच आयुष्यातील खरी कमाई असल्याचे त्यांनी सांगितले.
विशेष कार्यकारी अधिकारीपद ही केवळ प्रतिष्ठेची बाब नसून जनतेच्या सेवेसाठी मिळालेली महत्त्वपूर्ण संधी आहे. या पदाच्या माध्यमातून सामान्य नागरिकांचे प्रश्न समजून घेऊन ते सोडविण्यासाठी प्रयत्नशील राहणार असून समाजहिताच्या कामांना यापुढेही प्राधान्य देणार असल्याचा निर्धार त्यांनी व्यक्त केला. उद्योगमंत्री उदय सामंत यांचे आशीर्वाद आणि आमदार किरण ऊर्फ भैय्या सामंत यांचे मार्गदर्शन हीच आपल्या कार्याची प्रेरणा असल्याचेही त्यांनी नमूद केले.
राजकीय आणि सामाजिक क्षेत्रात काम करताना पदापेक्षा लोकांशी निर्माण झालेला विश्वास अधिक महत्त्वाचा असतो. याच भूमिकेतून तौसीफ पांजरी यांच्यावर सोपविण्यात आलेल्या नव्या जबाबदारीकडे पाहिले जात आहे. त्यांच्या नियुक्तीमुळे परिसरातील सामाजिक कार्याला अधिक बळ मिळेल, अशी अपेक्षा व्यक्त होत आहे.
तौसीफ अब्दुल रहीम पांजरी यांच्या नियुक्तीबद्दल विविध सामाजिक, शैक्षणिक व राजकीय क्षेत्रांतील पदाधिकारी, कार्यकर्ते, मित्रपरिवार आणि नागरिकांनी त्यांचे अभिनंदन करून पुढील वाटचालीस शुभेच्छा दिल्या आहेत.
