देवरुख: रत्नागिरी मार्गावर गेल्या महिन्यात आंबव परिसरात झालेल्या भीषण मोटारसायकल अपघातात गंभीर जखमी झालेल्या तुळसणी गावचे केतन संजय मोहिते यांची मृत्यूशी सुरू असलेली संघर्षमय झुंज सोमवारी अपयशी ठरली. उपचारादरम्यान त्यांचे निधन झाले.
गेल्या महिन्यात आंबव नजीक घडलेल्या अपघातात केतन मोहिते गंभीर जखमी झाले होते. अपघातानंतर त्यांना तातडीने उपचारासाठी रुग्णालयात दाखल करण्यात आले होते. तेव्हापासून ते मृत्यूशी निकराची झुंज देत होते.
कुटुंबीय आप्तस्वकीय आणि मित्रपरिवार त्यांच्या प्रकृतीत सुधारणा व्हावी यासाठी सातत्याने प्रार्थना करत होते; परंतु उपचारांना अपेक्षेप्रमाणे यश येऊ शकले नाही आणि अखेर सोमवारी त्यांची प्राणज्योत मालवली.
तरुणावस्थेतील हसऱ्या आणि मनमिळाऊ स्वभावाच्या केतन यांच्या अकाली निधनाने मोहिते कुटुंबावर दुःखाचा डोंगर कोसळला असून, संपूर्ण पंचक्रोशीत हळहळ व्यक्त होत आहे.
