१७ सप्टेंबर ते १७ ऑक्टोबर महिनाभर विविध लोककल्याणकारी उपक्रम; प्रत्येक ग्रामपंचायतीत २०० रोपांची लागवड
रत्नागिरी : पंतप्रधान नरेंद्र मोदी यांच्या घटनात्मक पदावरील सेवेची २५ वर्षे पूर्ण झाल्याच्या निमित्ताने तसेच ‘सेवा परमो धर्मः’ हा विचार तळागाळापर्यंत पोहोचविण्यासाठी राज्यभरात १७ सप्टेंबर ते १७ ऑक्टोबर या कालावधीत ‘सेवा संकल्प अभियान’ राबविण्यात येणार आहे. रत्नागिरी जिल्ह्यात या अभियानाचा शुभारंभ गुरुवारी प्रत्येक ग्रामपंचायतीमध्ये २०० रोपांची लागवड आणि आरोग्य शिबिरांच्या आयोजनातून होणार आहे. अभियानांतर्गत महिनाभर विविध लोककल्याणकारी आणि जनजागृतीपर उपक्रम राबविण्यात येणार असून, सर्व शासकीय यंत्रणांनी समन्वयाने काम करून अभियान यशस्वी करावे, असे आवाहन जिल्हाधिकारी मनुज जिंदल यांनी केले.
जिल्हाधिकारी कार्यालयाच्या सभागृहात ‘सेवा संकल्प अभियाना’च्या नियोजनाबाबत आयोजित विशेष आढावा बैठकीत जिल्हाधिकारी जिंदल यांनी विविध विभागांच्या अधिकाऱ्यांना मार्गदर्शन केले. यावेळी जिल्हा परिषदेच्या मुख्य कार्यकारी अधिकारी वैदेही रानडे, निवासी उपजिल्हाधिकारी चंद्रकांत सूर्यवंशी, उपप्रादेशिक परिवहन अधिकारी राजवर्धन करपे, जिल्हा शल्यचिकित्सक डॉ. भास्कर जगताप, जिल्हा आरोग्य अधिकारी डॉ. अनिरुद्ध आठल्ये, शासकीय वैद्यकीय महाविद्यालयाचे अधिष्ठाता डॉ. जयप्रकाश रामानंद, उपमुख्य कार्यकारी अधिकारी सागर पाटील, प्रभारी जिल्हा सैनिक कल्याण अधिकारी प्रविण बिरादार यांच्यासह विविध विभागांचे प्रमुख अधिकारी उपस्थित होते.
अभियानाचा मुख्य उद्देश सर्वसामान्य नागरिकांचे जीवन सुकर करणे आणि त्यांना विविध शासकीय सेवांचा थेट लाभ मिळवून देणे हा असल्याचे जिल्हाधिकारी जिंदल यांनी सांगितले. शासनाच्या योजनांची माहिती आणि त्यांचा लाभ अधिकाधिक नागरिकांपर्यंत पोहोचविण्यासाठी व्यापक जनजागृती करण्याच्या सूचना त्यांनी दिल्या. ‘सेवा सेतू’ उपक्रमांतर्गत तहसीलदार आणि उपविभागीय अधिकाऱ्यांनी तालुकास्तरावर विशेष शिबिरे आयोजित करून प्रलंबित दाखले व विविध शासकीय सेवा नागरिकांना तातडीने उपलब्ध करून द्याव्यात, असेही त्यांनी स्पष्ट केले.
अभियानाच्या कालावधीत नगरपरिषदा आणि पंचायत समित्यांच्या माध्यमातून जिल्ह्यातील प्रसिद्ध समुद्रकिनारे, नदीघाट तसेच ऐतिहासिक बारवांच्या स्वच्छतेसाठी विशेष मोहीम राबविण्यात येणार आहे. कौशल्य, रोजगार, उद्योजकता व नाविन्यता विभागामार्फत तरुण, नवउद्योजक आणि ग्रामीण भागातील कल्पक संशोधकांना एकत्र आणण्यासाठी ‘इनोव्हेशन चॅलेंज’ आयोजित केले जाणार आहे. शिक्षण विभागाकडून शासकीय आणि खासगी शाळांमध्ये ‘विकसित भारत’ या संकल्पनेवर आधारित चित्रकला स्पर्धा व प्रदर्शन भरविण्यात येणार आहे.
महिला व बालविकास विभागाच्या माध्यमातून महिलांसाठी आरोग्य व पोषणविषयक शिबिरे, तर लहान मुलांसाठी मनोरंजनात्मक कार्यक्रम आयोजित केले जाणार आहेत. केंद्र आणि राज्य शासनाच्या विविध कल्याणकारी योजनांची माहिती नागरिकांपर्यंत पोहोचविण्यासाठी शाळा, महाविद्यालये आणि ग्रामपंचायतींमध्ये कलापथक तसेच पथनाट्यांचे आयोजन करण्यात येणार आहे. शासनाच्या योजनांचा प्रत्यक्ष लाभ घेतलेल्या लाभार्थ्यांच्या घरी जाऊन ‘आशीर्वादाचा दीप’ प्रज्वलित करण्याबरोबरच जनजागृतीसाठी ‘मानवी रांगोळी’चे आयोजनही करण्यात येणार आहे.
गुरुवारपासून सुरू होणाऱ्या या महिनाभराच्या अभियानाच्या माध्यमातून शासकीय सेवा, आरोग्य, पर्यावरण, शिक्षण, स्वच्छता, रोजगार आणि जनजागृती अशा विविध क्षेत्रांतील उपक्रमांना चालना देण्याचे प्रशासनाचे नियोजन आहे. समाजातील प्रत्येक घटकाने या अभियानात सहभागी होऊन प्रशासनाला सहकार्य करावे आणि समन्वयातून रत्नागिरी जिल्ह्याचा ठसा उमटवावा, असे आवाहन जिल्हाधिकारी मनुज जिंदल यांनी केले.
