रत्नागिरी : रत्नागिरी विमानतळावर अत्याधुनिक ‘इन्स्ट्रुमेंट लँडिंग सिस्टीम’ (आयएलएस) बसवण्यासाठी सुमारे सात एकर जागेची आवश्यकता भासत असली, तरी विकासाच्या नावाखाली स्थानिकांची घरे किंवा श्रद्धास्थानांवर हातोडा चालवला जाणार नाही, अशी ठाम ग्वाही देण्यात आली आहे. या प्रकल्पात घरे आणि मंदिर बाधित होण्याची शक्यता निर्माण झाल्याने धास्तावलेल्या स्थानिक नागरिकांनी प्रत्यक्ष भेट घेऊन आपल्या तीव्र समस्या व चिंता मांडल्या. या भेटीनंतर केवळ कागदावरील नकाशे पाहून निर्णय न घेता, प्रशासकीय अधिकाऱ्यांना सोबत घेऊन प्रस्तावित जागेची आणि आसपासच्या संभाव्य बाधित घरांची थेट घटनास्थळी जाऊन सविस्तर पाहणी करण्यात आली.
विमानतळाचा विकास शहराच्या दृष्टीने अत्यंत महत्त्वाचा असला, तरी नागरिकांचे राहते छत आणि श्रद्धास्थानांचे रक्षण करणे तितकेच गरजेचे असल्याची भूमिका यावेळी स्पष्ट करण्यात आली. प्रकल्पामुळे नागरिकांचे नुकसान टाळण्यासाठी आयएलएस सिस्टीमकरिता इतर तांत्रिक पर्यायांची पडताळणी करण्याच्या स्पष्ट सूचना संबंधित अधिकाऱ्यांना देण्यात आल्या आहेत. विशेषतः दमण विमानतळावर वापरल्या जाणाऱ्या एअरपोर्ट सिस्टीमची माहिती घेऊन, त्याच धर्तीवर रत्नागिरीत अशा यंत्रणेचा उपयोग करता येईल का, यावर दमण प्रशासनाशी तात्काळ चर्चा करण्याचे निर्देश यंत्रणेला देण्यात आले आहेत.
विमानतळाचा सर्वांगीण विकास साधतानाच स्थानिकांचे हक्क, घरे आणि श्रद्धास्थाने पूर्णपणे सुरक्षित ठेवून दोन्हींचा योग्य समतोल साधला जाईल, असे आश्वासन उपस्थित नागरिकांना देण्यात आले आहे. प्रत्यक्ष जमिनीवरील वास्तव समजून घेऊनच पुढील पावले उचलली जातील, या भूमिकेमुळे विमानतळ परिसरातील बाधित नागरिकांना मोठा दिलासा मिळाला आहे.
