रत्नागिरी: श्री गणेशोत्सवाचे औचित्य साधून रत्नागिरी तालुक्यातील कळझोंडी उपकेंद्र येथे ‘श्री गणेशा आरोग्याचा अभियान २०२६’ अंतर्गत सामुदायिक आरोग्य तपासणी शिबिराचे यशस्वी आयोजन करण्यात आले. ग्रामीण भागातील नागरिकांचे आरोग्य सुदृढ राहावे या उद्देशाने आयोजित या शिबिरामध्ये ६२ रुग्णांची मोफत वैद्यकीय तपासणी करून आवश्यक औषधोपचार व मार्गदर्शन करण्यात आले.
मालगुंड प्राथमिक आरोग्य केंद्राचे वैद्यकीय अधिकारी डॉ. ऋषिकेश डोके आणि आरोग्य सहाय्यक परशुराम निवेंडकर यांच्या मार्गदर्शनाखाली हे शिबिर पार पडले. या उपक्रमादरम्यान नागरिकांचे वजन, उंची, रक्तदाब आणि रक्तातील साखर तपासण्यात आली. यासोबतच इतर आवश्यक रक्त तपासण्या, नियमित लसीकरण आणि पात्र लाभार्थ्यांना ‘आयुष्मान भारत गोल्डन कार्ड’चे वाटप करण्यात आले. दैनंदिन जीवनात आरोग्य तपासणीचे महत्त्व आणि निरोगी जीवनशैली यावर उपस्थित कर्मचाऱ्यांनी नागरिकांना सविस्तर समुपदेशन केले.
वैद्यकीय अधिकारी डॉ. ऋषिकेश डोके यांनी कळझोंडी उपकेंद्राला प्रत्यक्ष भेट देऊन शिबिराच्या कामकाजाची पाहणी केली व आरोग्य पथकाच्या उत्कृष्ट नियोजनाबद्दल समाधान व्यक्त केले. हे शिबिर यशस्वी करण्यासाठी आरोग्य सहाय्यिका सीमा पाडवी, समुदाय आरोग्य अधिकारी अक्षता नंदकुमार शिर्सेकर, आरोग्य सेविका डी. एस. गावडे, आरोग्य सेवक एस. एन. अंबुरे, आशा स्वयंसेविका साक्षी सुहास पवार, निशा मुकुंद वीर आणि मदतनीस नम्रता सिद्धार्थ पवार यांनी विशेष परिश्रम घेतले. कार्यक्रमाच्या शेवटी समुदाय आरोग्य अधिकारी अक्षता शिर्सेकर यांनी वैद्यकीय अधिकारी व सहकारी कर्मचाऱ्यांचे आभार मानले. ग्रामीण भागात आरोग्य जनजागृती निर्माण करणाऱ्या या उपक्रमाचे ग्रामस्थांकडून कौतुक होत आहे.
