रत्नागिरी : नाचणे येथे बोटीवर विराजमान गणराया; ‘समुद्र सफर’ देखाव्याने वेधले भक्तांचे लक्ष

रत्नागिरी/अजय सावंत : शहरानजिकच्या पिंपळवाडी, नाचणे येथील योगेश नारकर यांनी यंदाच्या गणेशोत्सवानिमित्त ‘समुद्र सफर’ ही अनोखी संकल्पना साकारली आहे. अथांग समुद्राच्या सान्निध्यात बोटीवर विराजमान केलेल्या गणरायाचा आकर्षक देखावा सध्या भक्तांचे लक्ष वेधून घेत आहे.

या देखाव्यासाठी नारकर यांनी अनेक दिवसांपासून नियोजन आणि मेहनत घेतली. सजावटीतील प्रत्येक छोटीशी गोष्ट बारकाईने तयार करण्यात आली असून, रंगसंगतीपासून सजावटीपर्यंत प्रत्येक बाबीला विशेष महत्त्व देण्यात आले आहे. बोटीवर विराजमान असलेले गणरायाचे रूप आणि आजूबाजूला साकारण्यात आलेला अथांग समुद्र यामुळे संपूर्ण देखाव्याला एक मनमोहक स्वरूप प्राप्त झाले आहे.

‘समुद्र सफर’ ही संकल्पना प्रत्यक्षात आणण्यासाठी योगेश नारकर यांनी दिवस-रात्र मेहनत घेतली. कल्पनेपासून प्रत्यक्ष साकारण्यापर्यंत प्रत्येक टप्प्यावर त्यांनी बारकाईने काम करत देखावा पूर्णत्वास नेला. भक्ती, कल्पकता आणि मेहनतीचा सुंदर संगम या देखाव्यात पाहायला मिळत आहे.

गणरायाच्या आगमनाने परिसरात भक्तिमय वातावरण निर्माण झाले असून, हा देखावा पाहण्यासाठी गर्दी होत आहे.