दाभोळेत भक्तिमय वातावरणात गणरायाला भावपूर्ण निरोप

दाभोळे (सिकंदर फरास) : दाभोळे गावातील लाडक्या गणरायाला शनिवारी (१९ सप्टेंबर) उत्साहपूर्ण आणि भक्तिमय वातावरणात भावपूर्ण निरोप देण्यात आला. ढोल-ताशांचा गजर, ‘गणपती बाप्पा मोरया, पुढच्या वर्षी लवकर या’च्या जयघोषाने संपूर्ण परिसर दुमदुमून गेला होता. बाप्पाला निरोप देताना अनेक भाविकांच्या डोळ्यांत अश्रू तरळले, तर पुढील वर्षी गणरायाचे लवकर आगमन होणार असल्याचा आनंदही ग्रामस्थांच्या चेहऱ्यावर दिसत होता.

गावातील तरुणांसह ग्रामस्थांनी गणरायाची वाजत-गाजत मिरवणूक काढली. ढोल-ताशांच्या तालावर तरुणाईने उत्स्फूर्त सहभाग घेतला. गुलालाची उधळण आणि जयघोषात मिरवणूक विसर्जनस्थळी पोहोचली. यावेळी गणरायाची आरती करून भाविकांनी पुढील वर्षी लवकर आगमनाचे साकडे घातले. त्यानंतर भक्तिभावाने गणरायाचे विसर्जन करण्यात आले.

ग्रामस्थांच्या सहकार्यामुळे संपूर्ण विसर्जन सोहळा शांततेत आणि शिस्तबद्ध पद्धतीने पार पडला. कोणताही अनुचित प्रकार घडू नये यासाठी पोलीस प्रशासनाकडूनही चोख बंदोबस्त ठेवण्यात आला होता. गणेशोत्सवाच्या दिवसांत दाभोळे गावात निर्माण झालेले भक्तिमय वातावरण बाप्पाच्या विसर्जनाने भावनिक क्षणांनी निरोप घेतले.