चिपळूण : ‘आपली माणसं… आपली संस्था!’ या ब्रीदवाक्याला केंद्रस्थानी ठेवून सहकार क्षेत्रात विश्वासार्हता, पारदर्शकता आणि सामाजिक बांधिलकीची स्वतंत्र ओळख निर्माण करणाऱ्या चिपळूण नागरी सहकारी पतसंस्थेचा ३३ वा वर्धापनदिन सोमवार, १९ ऑक्टोबर २०२६ रोजी विविध भरगच्च उपक्रमांनी साजरा केला जाणार आहे. १९ ऑक्टोबर १९९३ रोजी संस्थापक-अध्यक्ष सुभाषराव चव्हाण यांच्या नेतृत्वाखाली सुरू झालेल्या या संस्थेने सभासद, ठेवीदार आणि ग्राहकांच्या भक्कम पाठबळावर सहकार चळवळीत स्वतःचे वेगळे स्थान निर्माण केले आहे. यंदाच्या वर्धापन दिनाचे औचित्य साधून संस्थेच्या वतीने सहकार मेळावा, कृषी व व्यावसायिक क्षेत्रातील कर्तृत्ववानांचा सन्मान सोहळा आणि रंगतदार सांस्कृतिक मेजवानीचे आयोजन करण्यात आले आहे.
सोमवारी सकाळी १० वाजता बहादूरशेखनाका येथील पतसंस्थेच्या ‘सहकार भवन’ सभागृहात संस्थापक-अध्यक्ष सुभाषराव चव्हाण यांच्या अध्यक्षतेखाली विशेष सहकार मेळावा पार पडणार आहे. या मेळाव्यास सहकार व पणन वस्त्रोद्योग मंत्रालयाचे माजी अपर आयुक्त एस. बी. पाटील, महाराष्ट्र राज्य सहकारी संस्थेचे सेवानिवृत्त सहनिबंधक मिलिंद सोबले, रत्नागिरीचे जिल्हा उपनिबंधक राम कुलकर्णी, सेवानिवृत्त जिल्हा उपनिबंधक डॉ. सोपान शिंदे आणि आंतरराष्ट्रीय ख्यातीचे ग्रामीण कथाकार बाबासाहेब परीट (बिळाशी) यांची प्रमुख उपस्थिती लाभणार आहे. ग्रामीण अर्थव्यवस्थेचा मुख्य कणा असलेल्या शेतीत नवनवे प्रयोग राबवून प्रगती साधणाऱ्या प्रगतशील शेतकऱ्यांचा तसेच स्थानिक पातळीवर यशस्वी उद्योग-व्यवसाय उभारून रोजगाराला चालना देणाऱ्या उल्लेखनीय व्यावसायिकांचा या सोहळ्यात विशेष सन्मान केला जाणार आहे.
वर्धापनदिनाच्या निमित्ताने त्याच दिवशी सायंकाळी ४ वाजता इंदिरा गांधी सांस्कृतिक केंद्रात चिपळूण नागरी परिवाराच्या वतीने दिमाखदार सांस्कृतिक कार्यक्रमाचे आयोजन करण्यात आले आहे. सभासद, ग्राहक, ठेवीदार आणि हितचिंतकांना एकत्र आणणाऱ्या या सांस्कृतिक सोहळ्यामुळे वर्धापनदिनाच्या उत्सवाला अधिक रंगत येणार आहे. संस्थेच्या या दोन्ही महत्त्वपूर्ण कार्यक्रमांना सर्व सभासद, ग्राहक आणि नागरिकांनी मोठ्या संख्येने उपस्थित राहावे, असे आवाहन चिपळूण नागरी सहकारी पतसंस्थेच्या मुख्य कार्यकारी अधिकारी स्वप्ना यादव यांनी केले आहे.
