रत्नागिरी: राज्याच्या सागरी अर्थव्यवस्थेत आणि मत्स्य व्यवसायात रत्नागिरी जिल्ह्याचे स्थान अनन्यसाधारण असून, या क्षेत्रात आधुनिक तंत्रज्ञानाचा वापर करून कोकणात नव्या पिढीचे मत्स्य उद्योजक घडवण्याची गरज आहे, असे प्रतिपादन महाराष्ट्राचे उद्योग व मराठी भाषा मंत्री तथा रत्नागिरीचे पालकमंत्री उदय सामंत यांनी केले. शिरगाव येथील शासकीय मत्स्य अभियांत्रिकी तंत्रनिकेतनला त्यांनी नुकतीच सदिच्छा भेट देऊन तेथील शैक्षणिक व पायाभूत सुविधांची सविस्तर पाहणी केली, त्यावेळी ते बोलत होते. या भेटीदरम्यान त्यांनी तंत्रनिकेतनमधील विद्यार्थी आणि प्राध्यापकांशी संवाद साधून शैक्षणिक उपक्रमांचा आढावा घेतला.
डॉ. बाळासाहेब सावंत कोकण कृषी विद्यापीठाच्या अंतर्गत स्थानिक मच्छिमारांच्या मागणीनुसार २०११ साली स्थापन झालेले हे तंत्रनिकेतन शास्त्रोक्त व शाश्वत मासेमारीचे शिक्षण देणारे देशातील पहिलेच वैशिष्ट्यपूर्ण केंद्र ठरले आहे. कोकणातील तरुणांना दहावीच्या परीक्षेनंतर अकरावी-बारावी न करता थेट मत्स्य व्यवसायाचे व्यावसायिक शिक्षण घेता यावे आणि कमी कालावधीत रोजगार व स्वयंरोजगाराच्या संधी मिळाव्यात, या उद्देशाने येथे तीन वर्षांचा पदविका अभ्यासक्रम राबवला जात आहे. या संकुलातील मुख्य प्रशासकीय इमारत तसेच मुले व मुलींसाठीच्या स्वतंत्र वसतिगृहांची पाहणी करतानाच मासेमारी जाळे, इंजिन दुरुस्ती, नौका बांधणी, मत्स्य प्रक्रिया कार्यशाळा आणि मत्स्यबीज उत्पादन केंद्राच्या सुरू असलेल्या कामांची माहिती ना. सामंत यांनी घेतली व आवश्यक त्या पायाभूत सुधारणा तातडीने करण्याचे निर्देश प्रशासनाला दिले.
नवीन राष्ट्रीय शैक्षणिक धोरणानुसार विद्यार्थ्यांच्या प्रत्यक्ष कौशल्य विकासावर भर देऊन त्यांना केवळ नोकरी मागणारे न बनवता व्यवसाय निर्माण करणारे उद्योजक बनवण्यासाठी सर्वतोपरी प्रयत्न व्हावेत, अशी अपेक्षा यावेळी ना. सामंत यांनी व्यक्त केली. भेटीदरम्यान तंत्रनिकेतनाचे प्राचार्य डॉ. केतन चौधरी यांनी संस्थेच्या एकूण वाटचालीचा व उपक्रमांचा सविस्तर अहवाल सादर केला, तर प्राध्यापक तौसीफ काझी, डॉ. सुशील कांबळे आणि मयुरी डोंगरे यांनी विद्यार्थ्यांना दिल्या जाणाऱ्या विविध प्रात्यक्षिकांची माहिती पालकमंत्र्यांना दिली. ना. उदय सामंत यांच्या या दौऱ्यामुळे तंत्रनिकेतनातील विद्यार्थी व प्राध्यापक वर्गात नवी उमेद व उत्साहाचे वातावरण निर्माण झाले आहे.
