गणपतीपुळे (वैभव पवार): रत्नागिरी तालुक्यातील मालगुंड येथील कोकण मराठी साहित्य परिषद (कोमसाप) शाखेची विशेष सभा नुकतीच कविवर्य केशवसुत स्मारक सभागृहात उत्साहात पार पडली. कवी केशवसुत स्मारक व्यवस्थापन समितीचे अध्यक्ष गजानन पाटील यांच्या अध्यक्षतेखाली झालेल्या या सभेत रत्नागिरीत होणारी अभिजात भाषा आंतरराष्ट्रीय परिषद आणि मालगुंड येथे नियोजित केंद्रीय मराठी साहित्य संमेलनाच्या पूर्वतयारीचा सविस्तर आढावा घेण्यात आला.
रत्नागिरी येथे दिनांक २३, २४ आणि २५ ऑक्टोबर रोजी अभिजात भाषा आंतरराष्ट्रीय परिषद आयोजित करण्यात आली आहे. या परिषदेनिमित्त २५ ऑक्टोबर रोजी देशभरातील विविध राज्यांतील अकरा भाषांचे प्रतिनिधी तसेच सुमारे अडीचशे ते तीनशे मान्यवरांचे पथक कविवर्य केशवसुत स्मारकाला भेट देणार आहे. या संपूर्ण प्रतिनिधीमंडळाचे मालगुंडमध्ये जल्लोषी आणि खास कोकणी संस्कृतीनुसार पारंपरिक आदरातिथ्य करत भव्य स्वागत करण्याचा निर्णय या सभेत एकमुखाने घेण्यात आला. तसेच या आंतरराष्ट्रीय परिषदेला मालगुंड शाखेच्या सर्व सदस्यांनी मोठ्या संख्येने उपस्थित राहण्याचे आवाहनही करण्यात आले.
याशिवाय दिनांक २७, २८ आणि २९ नोव्हेंबर रोजी मालगुंड येथे होणाऱ्या केंद्रीय मराठी साहित्य संमेलनाचे बिगुल वाजले असून, त्यादृष्टीने स्थानिक पातळीवर नियोजनबद्ध आखणी सुरू करण्यात आली आहे. यापूर्वी सन २०११ मध्ये केंद्रीय मराठी साहित्य संमेलन मालगुंड नगरीत यशस्वीरीत्या पार पडले होते. त्यानंतर तब्बल १५ वर्षांनंतर पुन्हा एकदा हा बहुमान कविवर्य केशवसुत स्मारकाला मिळाला असल्याची माहिती अध्यक्ष गजानन पाटील यांनी दिली.
दरम्यान, मालगुंड येथील ‘पुस्तकांचे गाव’ या महत्त्वाकांक्षी उपक्रमांतर्गत गावात लवकरच नवीन दालने सुरू करण्याबाबतही बैठकीत सविस्तर चर्चा झाली. ही नवीन दालने तातडीने कार्यान्वित करण्यासाठी संबंधित दालनधारकांना मार्गदर्शक सूचना देऊन प्रत्यक्ष तयारी सुरू करण्याचे निर्देश देण्यात आले. या सभेला कोमसापचे केंद्रीय कार्यवाह माधव अंकलगे, मालगुंड शाखेचे सचिव विलास राणे, कोमसाप दक्षिण युवा शक्तीचे प्रमुख अरुण मोर्ये, रामानंद लिमये, डॉ. संतोष केळकर, हनुमंत कदम, वैभव पवार, मोरेश्वर मुळ्ये, शुभदा मुळ्ये, उज्वला बापट, गणपतीपुळे भक्तनिवासचे व्यवस्थापक अजिंक्य जाधव तसेच नवीन दालनधारक व विविध मान्यवर उपस्थित होते.
