रत्नागिरी : शहरातील कुवारबाव परिसरात भरधाव वेगाने जाणाऱ्या डंपरने दुचाकीला मागून जोरदार धडक दिल्याने १९ वर्षीय तरुण जखमी झाला. अपघातानंतर हायवा चालक घटनास्थळावरून वाहनासह फरार झाला. ही घटना ७ नोव्हेंबर २०२६ रोजी सायंकाळी ४.४५ वाजण्याच्या सुमारास पाटबंधारे कॉलनीसमोर, कांचन हॉटेलकडे जाणाऱ्या रस्त्याच्या तिठ्यावर घडली.
हर्ष सुनील लाखण (वय १९, मूळ रा. शेणवडे, ता. संगमेश्वर, सध्या रा. कुवारबाव, रत्नागिरी) असे जखमी तरुणाचे नाव आहे. पोलिसांनी दिलेल्या माहितीनुसार, हर्ष लाखण हे आपल्या ताब्यातील काळ्या रंगाच्या एक्स्ट्रीम १२५ दुचाकीवरून (क्रमांक MH 08 BL 3613) कुवारबाव येथील पाटबंधारे कॉलनीसमोरील रस्त्याने प्रवास करत होते. यावेळी रत्नागिरीच्या दिशेने येणाऱ्या चारचाकी हायवा वाहनाने (क्रमांक MH 08 GJ 2855) त्यांच्या दुचाकीला मागील बाजूने जोरदार धडक दिली.
हायवा चालकाने रस्त्यावरील परिस्थितीकडे दुर्लक्ष करून वाहन भरधाव वेगाने व निष्काळजीपणे चालवल्याने हा अपघात घडल्याचे तक्रारीत नमूद आहे. धडकेनंतर हर्ष यांच्या डाव्या हाताच्या मनगटाला किरकोळ दुखापत झाली असून छातीला मुका मार लागला आहे. अपघात घडल्यानंतर हायवा चालकाने घटनास्थळी न थांबता वाहनासह पलायन केले.
या प्रकरणी हर्ष लाखण यांनी दिलेल्या फिर्यादीवरून रत्नागिरी शहर पोलीस ठाण्यात गुन्हा रजिस्टर क्रमांक ४६१/२०२६ अन्वये भारतीय न्याय संहिता २०२३ चे कलम २८१, १२५(अ) तसेच मोटार वाहन कायद्याच्या कलम १८४ आणि १३४(ब) नुसार ७ नोव्हेंबर रोजी रात्री ११.२० वाजता गुन्हा दाखल करण्यात आला आहे. फरार हायवा चालकाचा शोध सुरू असून या अपघाताचा पुढील तपास रत्नागिरी शहर पोलीस करीत आहेत.
