रत्नागिरी : अमली पदार्थविरोधी कारवाईला वेग देत रत्नागिरी शहर पोलिसांच्या गुन्हे प्रकटीकरण पथकाने मुरुगवाडा-पांढरा समुद्र परिसरात कारवाई करून ३ ग्रॅम वजनाचे ब्राऊन हेरॉईन जप्त केले. या प्रकरणी ऋषिकेश संतोष चव्हाण (वय २२, रा. भैरी मंदिराजवळ, मुरुगवाडा, रत्नागिरी) याला पोलिसांनी ताब्यात घेतले आहे. जप्त अमली पदार्थासह दुचाकी असा सुमारे १ लाख ५० हजार रुपयांचा मुद्देमाल पोलिसांनी ताब्यात घेतला आहे.
दि. २२ सप्टेंबर रोजी रत्नागिरी शहर पोलीस ठाण्याचे गुन्हे प्रकटीकरण पथक शहर परिसरात गस्त घालत असताना मुरुगवाडा-पांढरा समुद्र येथील पाण्याच्या टाकीजवळ ऋषिकेश चव्हाण हा संशयास्पदरीत्या आढळून आला. पोलिसांनी त्याची झडती घेतली असता त्याच्याकडे विक्रीच्या उद्देशाने बाळगलेले ३ ग्रॅम ब्राऊन हेरॉईन आढळून आले. त्यानंतर पोलिसांनी अमली पदार्थासह एमएच ०८ बीएल ५५१३ क्रमांकाची दुचाकीही जप्त केली.
या प्रकरणी ऋषिकेश चव्हाण याच्याविरुद्ध एनडीपीएस कायद्यानुसार गुन्हा दाखल करण्यात आला असून पुढील तपास आणि कायदेशीर कारवाई सुरू आहे. ही कारवाई उपविभागीय पोलीस अधिकारी अरांक्षा यादव (भा.पो.से.), परीक्षाधीन पोलीस उपअधीक्षक अभिजीत थोरात आणि पोलीस निरीक्षक विवेक पाटील यांच्या मार्गदर्शनाखाली करण्यात आली.
कारवाईच्या पथकात पोलीस उपनिरीक्षक सागर शिंदे, सहाय्यक पोलीस फौजदार दीपक साळवी, पोलीस हवालदार शांताराम झोरे, दिनेश आखाडे, भालचंद्र मयेकर तसेच पोलीस कॉन्स्टेबल अमित पालवे आणि निलेश शिंगवे यांचा समावेश होता.
