नाटे परिसरात भरधाव कारची दुचाकीला पाठीमागून धडक; दुचाकीस्वार गंभीर जखमी

राजापूर : आडीवरे ते रत्नागिरी मार्गावर नवेदर ते कोंडसर बसथांबा दरम्यान स्मशानभूमीजवळ भरधाव आणि निष्काळजीपणे चालविलेल्या कारने दुचाकीला पाठीमागून जोरदार धडक दिल्याची घटना ५ मे २०२६ रोजी सकाळी घडली. या अपघातात दुचाकीस्वाराच्या दोन्ही पायांसह उजव्या हाताला गंभीर व साधी दुखापत झाली असून दोन्ही वाहनांचे नुकसान झाले आहे.

या प्रकरणी प्रकाश राजाराम साळवी (वय ५५, रा. वाडापठ, आडीवरे, ता. राजापूर; मूळ रा. फणसवणे कुंभारवाडी, ता. संगमेश्वर) यांनी दिलेल्या फिर्यादीवरून नाटे पोलिस ठाण्यात यासीर निसार हबीब (वय ३०, रा. नाटे, ता. राजापूर) याच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, ५ मे रोजी सकाळी सुमारे ९.५५ वाजता साळवी हे आपल्या दुचाकीने (एमएच-०८-एसी-६६०४) आडीवरे ते रत्नागिरी मार्गावरून जात होते. त्यावेळी नवेदर ते कोंडसर बसथांबा दरम्यान स्मशानभूमीसमोर आरोपी यासीर हबीब याने आपल्या ताब्यातील मारुती स्विफ्ट कार (एमएच-०८-आर-५२८८) भरधाव व निष्काळजीपणे चालवून साळवी यांच्या दुचाकीला पाठीमागून जोरदार धडक दिली.

या धडकेत साळवी यांच्या उजव्या व डाव्या पायाला तसेच उजव्या हाताला दुखापत झाली. तसेच अपघातात दोन्ही वाहनांचे नुकसान झाले. या घटनेची नोंद १५ सप्टेंबर २०२६ रोजी सायंकाळी ६.१० वाजता करण्यात आली. याप्रकरणी भारतीय दंड संहितेतील कलम २८१, १२५ (अ), (ब), ३२४ (५) तसेच मोटार वाहन कायद्यातील कलम १८४ अन्वये गुन्हा क्रमांक ९९/२०२६ दाखल करण्यात आला असून नाटे पोलिस अधिक तपास करीत आहेत.