जैतापूर येथे भरधाव कारची समोरून धडक; दोन्ही वाहनांचे नुकसान

राजापूर : राजापूर-जैतापूर मार्गावर कारचालकाने हयगयीने व बेदरकारपणे वाहन चालवत विरुद्ध दिशेने जाऊन समोरून येणाऱ्या कारला धडक दिल्याची घटना १३ सप्टेंबर रोजी सकाळी सव्वाअकराच्या सुमारास जैतापूर येथील होळी फाटा परिसरात घडली. या अपघातात दोन्ही वाहनांचे नुकसान झाले आहे.

याबाबत प्रविण गोपीनाथ मोरे यांनी नाटे पोलीस ठाण्यात फिर्याद दिली आहे. त्यानुसार, मोरे हे विरार, मुंबई येथे राहणाऱ्या रविकांत दांडेकर यांच्या कुटुंबीयांना त्यांच्या ताब्यातील एमएच ०३ ईएस २००० या कारमधून जैतापूर मठवाडी येथे सोडून सागरी महामार्गाने परत जात होते. ते जैतापूर येथील होळी फाटा येथे आले असता देवगडच्या दिशेने जैतापूरकडे जाणाऱ्या एमएच ४६ सीई १११५ क्रमांकाच्या इर्टिगा कारच्या चालकाने भरधाव वेगाने वाहन चालवत विरुद्ध बाजूने येऊन मोरे यांच्या कारला धडक दिली.

या धडकेत दोन्ही वाहनांचे नुकसान झाले. याप्रकरणी कारचालक आशिष अरविंद पारकर (४८, रा. ठाणे; मूळ रा. मधील आगरवाडी, जैतापूर, ता. राजापूर) याच्याविरुद्ध नाटे पोलीस ठाण्यात गुन्हा दाखल करण्यात आला आहे. गुन्हा क्रमांक ९७/२०२६ असून भारतीय न्यायसंहिता अधिनियम २०२३ मधील कलम २८१, ३२४(५) तसेच मोटार वाहन अधिनियम १९८८ मधील कलम १८४ अन्वये कारवाई करण्यात आली आहे. गुन्हा १४ सप्टेंबर रोजी दुपारी ३.१८ वाजता दाखल करण्यात आला.