रत्नागिरी : शहरातील मिरजोळे पाडावेवाडी येथील अनुराधा अपार्टमेंटमध्ये एका ७६ वर्षीय वृद्धाचा घरातील शौचालयात बेशुद्धावस्थेत आढळून आल्यानंतर उपचारापूर्वीच मृत्यू झाल्याची घटना शनिवारी (२६ सप्टेंबर) घडली. काशीनाथ पांडुरंग केळकर (वय ७६, रा. रूम नं. २१०, अनुराधा अपार्टमेंट, मिरजोळे पाडावेवाडी, रत्नागिरी) असे मृत वृद्धाचे नाव आहे.
मिळालेल्या माहितीनुसार, काशीनाथ केळकर हे फोन उचलत नसल्याने त्यांची सून आरती संतोष केळकर यांनी स्वप्निल दशरथ खेडेकर यांना फोन करून काशीनाथ यांची चौकशी करून येण्यास सांगितले. त्यानंतर स्वप्निल खेडेकर हे मिरजोळे पाडावेवाडी येथील अनुराधा अपार्टमेंटमधील रूम क्रमांक २१० येथे गेले. यावेळी घराच्या दरवाजाची कडी आतून लावलेली असल्याचे त्यांच्या निदर्शनास आले.
खेडेकर यांनी दरवाजा जोराने ठोठावून तसेच बाहेरून आवाज देऊनही आतून कोणताही प्रतिसाद मिळाला नाही. त्यामुळे परिसरातील नागरिकांच्या मदतीने घराचा दरवाजा तोडून आत प्रवेश करण्यात आला. घरातील शौचालयात काशीनाथ केळकर हे बेशुद्धावस्थेत पडलेले आढळून आले. त्यांच्यामध्ये कोणतीही हालचाल जाणवत नसल्याने त्यांना तातडीने खासगी रुग्णवाहिकेतून रत्नागिरी जिल्हा शासकीय रुग्णालयात दाखल करण्यात आले.
मात्र, रुग्णालयातील वैद्यकीय अधिकाऱ्यांनी २६ सप्टेंबर रोजी दुपारी २.०८ वाजता उपचारापूर्वीच काशीनाथ पांडुरंग केळकर यांना मृत घोषित केले. या घटनेची नोंद रत्नागिरी शहर पोलीस ठाण्यात आकस्मिक मृत्यू क्रमांक १२१/२०२६, बीएनएसएस कलम १९४ अन्वये करण्यात आली असून पुढील तपास सुरू आहे.
