दाभोळे/सिकंदर फरास: दाभोळे आणि आजूबाजूच्या परिसरात विजांच्या कडकडाटासह आणि ढगांच्या गडगडाटासह परतीच्या पावसाने कालपासून हजेरी लावली आहे.गेल्या काही दिवसांपासून पडलेल्या कडक उन्हामुळे नागरिक त्रस्त झाले होते.
या पावसामुळे वातावरणात गारवा निर्माण झाला असून पिण्याच्या पाण्याचा प्रश्न काहीसा सुटण्याची शक्यता निर्माण झाली आहे. मात्र या वर्षी पावसाचे प्रमाण कमी असल्याने सगळीकडे दुष्काळसदृश परिस्थिती निर्माण झाली आहे. शासनाने आधीच पाण्याचा साठा राहण्यासाठी बंधारे बांधून पाणी अडवण्याचे निर्देश दिले आहेत.
दुसरीकडे पावसाच्या अभावामुळे आधीच भातशेतीचे मोठे नुकसान झाले होते. आता भातशेती कापणीला आली असताना या परतीच्या पावसामुळे कापून ठेवलेल्या शेतीचे मोठ्या प्रमाणावर नुकसान होण्याची भीती निर्माण झाली आहे. त्यामुळे आधीच संकटात सापडलेला शेतकरी वर्ग आता आणखीनच हताश झाला असून ऐन कापणीच्या वेळी आलेल्या या पावसामुळे बळीराजा दुहेरी संकटात सापडला आहे.
