शासकीय वैद्यकीय महाविद्यालयात २३ वे देहदान; ‘सेवा संकल्प अभियाना’तील पहिलेच दान

रत्नागिरी: वैद्यकीय शिक्षण घेणाऱ्या विद्यार्थ्यांच्या अभ्यासाला आणि वैद्यकीय संशोधनाला मोलाची मदत व्हावी, या सामाजिक भावनेतून नाटे येथील नामदेव दामोदर पाध्ये (वय ८५) यांच्या पार्थिवाचे शासकीय वैद्यकीय महाविद्यालय, रत्नागिरी येथे देहदान करण्यात आले. शासनाच्या ‘सेवा संकल्प अभियान’ अंतर्गत महाविद्यालयात झालेले हे पहिले देहदान असून, महाविद्यालयाच्या स्थापनेपासूनचे हे २३ वे देहदान ठरले आहे.

नामदेव पाध्ये यांचे १९ सप्टेंबर रोजी अल्पशा आजाराने लोटलीकर हॉस्पिटल येथे निधन झाले. त्यांनी सामाजिक बांधिलकीची जाणीव ठेवत २० मार्च २०२५ रोजी शासकीय वैद्यकीय महाविद्यालयात मरणोत्तर देहदानाचे इच्छापत्र भरून दिले होते. त्यांच्या निधनानंतर कुटुंबीयांनी त्यांच्या इच्छेचा सन्मान करत देहदानाचा निर्णय घेतला. पाध्ये यांच्या या निर्णयामुळे वैद्यकीय विद्यार्थ्यांना शरीररचनाशास्त्राच्या अभ्यासासाठी तसेच वैद्यकीय संशोधनासाठी त्यांच्या पार्थिवाचा उपयोग होणार आहे.

यावेळी शासकीय वैद्यकीय महाविद्यालयाचे अधिष्ठाता डॉ. जयप्रकाश रामानंद यांच्या हस्ते पाध्ये यांचे सुपुत्र महेश पाध्ये यांना सन्मानदर्शक प्रमाणपत्र प्रदान करण्यात आले. याप्रसंगी स्नुषा शुभदा पाध्ये, कन्या अर्चना गोखले, सुषमा गगनग्रास, ज्योती नेने, जावई तसेच डॉ. महेंद्र पाध्ये, प्रभात पाध्ये, गोपीनाथ करंबेकर, श्रीकांत गोखले यांच्यासह कुटुंबीय व नातेवाईक उपस्थित होते.

अधिष्ठाता डॉ. जयप्रकाश रामानंद यांच्या मार्गदर्शनाखाली शरीररचनाशास्त्र विभागप्रमुख डॉ. सादिकअली सय्यद, डॉ. योगिता कांबळे, समाजसेवा अधीक्षक रेशम जाधव तसेच पूर्वा तोडणकर, भूमी पारकर, प्रियल आडीवरेकर, मिथिलेश मुरकर, मिहीर लोंढे, श्रेयश जोशी, राज पेडणेकर, नितीन घोसाळकर आणि वाहनचालक सागर नारकर व प्रणय पाटील यांनी देहदानाची प्रक्रिया पूर्ण केली.

मरणोत्तर देहदानाचा निर्णय घेत नामदेव पाध्ये यांनी समाजाप्रती आपली बांधिलकी जपली असून, त्यांच्या कुटुंबीयांनीही त्यांच्या इच्छेचा आदर करत हा सामाजिक उपक्रम पूर्ण केला. पाध्ये कुटुंबीयांच्या या संवेदनशील आणि समाजोपयोगी निर्णयाचे सर्व स्तरातून कौतुक होत आहे.