दापोली : घरात स्वयंपाकाचे काम करणाऱ्या महिलेनेच मालकाच्या घरातील सुमारे ९८ हजार २८२ रुपये किमतीचे सोन्या-चांदीचे दागिने आणि रोख रकमेवर डल्ला मारल्याचा धक्कादायक प्रकार दापोली तालुक्यातील जालगाव विद्यानगर येथे उघडकीस आला आहे. या प्रकरणी फिर्यादीच्या तक्रारीवरून दापोली पोलीस ठाण्यात संशयित महिला मोलकरणीविरुद्ध घरफोडी व चोरीचा गुन्हा दाखल करण्यात आला आहे. उषा विकास सुर्वे (वय ४३ वर्षे, रा. गुरव चाळ, गजानन महाराज नगर, पेट्रोल पंपाजवळ, गिम्हवणे, ता. दापोली) असे गुन्हा दाखल झालेल्या संशयित महिलेचे नाव आहे.
या संदर्भात विद्यानगर जालगाव, नर्सरी रोड येथील रहिवासी रवींद्र गंगाराम क्षीरसागर (वय ६२) यांनी दापोली पोलीस ठाण्यात रीतसर फिर्याद दिली आहे. पोलिसांकडून मिळालेल्या माहितीनुसार, संशयित उषा सुर्वे ही फिर्यादी क्षीरसागर यांच्या घरी स्वयंपाकाचे काम करत होती. २१ सप्टेंबर रोजी दुपारी बारा वाजण्याच्या पूर्वी तिने घरातील लोकांची नजर चुकवून आणि विश्वासाचा गैरफायदा घेत स्वतःच्या आर्थिक फायद्यासाठी लबाडीच्या इराद्याने कपाटातील सोन्या-चांदीचे मौल्यवान दागिने आणि रोख रक्कम लंपास केली.
चोरीस गेलेल्या मुद्देमालामध्ये विविध वजनाची चार चांदीची निरांजने, एक चांदीची वाटी, एक चांदीचा करंडा, सुमारे २ ग्रॅम वजनाचे लहान मुलाच्या हातातील सोन्याचे ब्रेसलेट, सुमारे ०.३२० ग्रॅम वजनाची सोन्याची सटवी आणि ५०० रुपयांची रोख रक्कम असा एकूण ९८ हजार २८२ रुपयांचा ऐवज समाविष्ट आहे. घरात ठेवलेले दागिने जागेवर नसल्याचे लक्षात आल्यानंतर क्षीरसागर यांनी दापोली पोलीस ठाण्यात धाव घेत तक्रार दिली. या प्रकरणी पोलिसांनी संशयित उषा विकास सुर्वे हिच्याविरुद्ध भारतीय न्याय संहिता २०२३ च्या कलम ३०६ अन्वये मालकाच्या कब्जातील मालमत्तेची चोरी केल्याप्रकरणी गुन्हा दाखल केला असून, पोलीस या प्रकरणाचा अधिक तपास करत आहेत.
