गणपतीपुळे (वैभव पवार): ग्रामीण भागातील सामान्य जनतेला दर्जेदार व विश्वासार्ह वैद्यकीय सेवा मिळाव्यात या उद्देशाने वाटद खंडाळा येथे सुरू करण्यात आलेल्या डॉ. मयुरेश सुरेश मोहिते यांच्या ‘स्मिता क्लिनिक’च्या नवीन शाखेचे उद्घाटन महाराष्ट्राचे उद्योगमंत्री तथा रत्नागिरी जिल्ह्याचे पालकमंत्री ना. डॉ. उदय सामंत यांच्या हस्ते अत्यंत उत्साही वातावरणात संपन्न झाले. सैतवडे येथे आपल्या पहिल्या क्लिनिकच्या माध्यमातून गोरगरीब रुग्णांवर यशस्वी उपचार करत डॉ. मोहिते यांनी वैद्यकीय क्षेत्रात मोठा नावलौकिक व विश्वास संपादन केला असून, याच सेवेचा विस्तार करत त्यांनी खंडाळा दशक्रोशीतील नागरिकांसाठी ही नवी शाखा सुरू केली आहे. ग्रामीण रुग्णांना अविरत आरोग्य सेवा देत असल्याबद्दल पालकमंत्री उदय सामंत यांनी डॉ. मोहिते यांच्या रुग्णसेवेची विशेष दखल घेत त्यांचे मनःपूर्वक कौतुक केले व भावी वाटचालीस शुभेच्छा दिल्या.
या शानदार उद्घाटन सोहळ्याला शिवसेनेचे तालुकाप्रमुख बाबू म्हाप, प्रदीप साळवी, विभागप्रमुख योगेंद्र कल्याणकर, उपविभागप्रमुख अजीम चिकटे, अनिकेत सुर्वे, प्रशांत घोसाळे, माजी समाजकल्याण सभापती ऋतुजा जाधव, राजेश जाधव सर, माजी सरपंच अमित वाडकर, अमोल बैकर यांच्यासह वैद्यकीय क्षेत्रातील नामवंत डॉ. मुळे, डॉ. जाधव, डॉ. विकी सावंत, डॉ. दिक्षा सावंत, पॅथॉलॉजिस्ट प्रसाद पेढे आणि परिसरातील अनेक मान्यवर व मित्रपरिवार मोठ्या संख्येने उपस्थित होते. सोहळ्यादरम्यान मोहिते कुटुंबीयांच्या वतीने उपस्थित सर्व पाहुण्यांचे उत्साहात आणि आदरपूर्वक स्वागत करण्यात आले. खंडाळा एसटी बसस्थानकासमोर, लाईफलाईन मेडिकल शेजारी सुरू झालेले हे ‘स्मिता क्लिनिक’ दररोज सकाळी साडेआठ ते साडेअकरा या वेळेत रुग्णांच्या तपासणी व उपचारासाठी खुले राहणार असून, या आधुनिक आरोग्य सेवेचा लाभ परिसरातील गरजू रुग्णांना मोठ्या प्रमाणावर घेता येणार आहे.
