प्राथमिक आरोग्य केंद्र वाटदच्या सीसीटीव्ही यंत्रणेवर प्रश्नचिन्ह; माहिती देण्यास विलंब झाल्याचा आरोप

रत्नागिरी : रत्नागिरी तालुक्यातील प्राथमिक आरोग्य केंद्र वाटद येथील सीसीटीव्ही यंत्रणा बंद असल्याची माहिती माहितीच्या अधिकारातून समोर आली आहे. रुग्णालय परिसरातील सुरक्षा आणि देखरेखीच्या दृष्टीने महत्त्वाची असलेली ही यंत्रणा बंद असताना तिच्या स्थापनेपासून देखभाल-दुरुस्तीपर्यंतच्या बाबींबाबत स्पष्ट माहिती उपलब्ध नसल्याने प्रशासनाच्या कार्यपद्धतीवर प्रश्नचिन्ह उपस्थित झाले आहे. त्याचबरोबर मागविलेली माहिती देण्यास झालेल्या विलंबाबाबतही सवाल उपस्थित करण्यात येत आहेत.

माहिती अधिकार कार्यकर्ता महासंघाचे मुख्य संपर्कप्रमुख, रत्नागिरी जिल्हा व पत्रकार निलेश रहाटे यांनी प्राथमिक आरोग्य केंद्र वाटद येथील सीसीटीव्ही व्यवस्थेबाबत माहितीच्या अधिकाराखाली माहिती मागविली होती. त्यावर जन माहिती अधिकारी तथा आरोग्य सहायक प्रभाकर कांबळे यांनी दिलेल्या माहितीनुसार, आरोग्य केंद्रातील सीसीटीव्ही कॅमेरे सध्या बंद असल्याचे स्पष्ट झाले आहे.

आरोग्य केंद्राच्या परिसरासह ईसीजी रूममध्ये सीसीटीव्ही यंत्रणा बसविण्यात आल्याचे संबंधित माहितीत नमूद करण्यात आले आहे. ही यंत्रणा ग्रामपंचायत वाटदचे सरपंच तसेच ‘टेलीमेडिसिन प्रोजेक्ट, सिंधुदुर्ग’ यांच्या स्तरावरून बसविण्यात आल्याचे सांगण्यात आले आहे. मात्र, सीसीटीव्ही यंत्रणा नेमकी कधी बसविण्यात आली, त्यासाठी किती निधी खर्च झाला, निधीचा स्रोत कोणता होता, देखभाल व दुरुस्तीची जबाबदारी कोणाची आहे आणि कॅमेरे किती कालावधीपासून बंद आहेत, याबाबत अद्याप स्पष्टता झालेली नाही.

दरम्यान, रहाटे यांनी माहितीच्या अधिकारातून मागविलेल्या माहितीपैकी काही माहिती संबंधित दुसऱ्या विभागाकडे उपलब्ध असल्याचे तब्बल एक महिन्यानंतर कळविण्यात आल्याचा दावा करण्यात आला आहे. मागितलेली माहिती संबंधित सार्वजनिक प्राधिकरणाकडे उपलब्ध नसल्यास ती योग्य प्राधिकरणाकडे वेळेत वर्ग करण्याची प्रक्रिया का करण्यात आली नाही, असा प्रश्न यामुळे उपस्थित होत आहे.

यासंदर्भात जन माहिती अधिकारी प्रभाकर कांबळे यांनी प्रतिनिधीशी बोलताना आपण जून २०२६ मध्ये प्राथमिक आरोग्य केंद्रात कार्यरत झाल्याचे सांगितले. त्यामुळे त्यांच्या पदभार स्वीकारण्यापूर्वी सीसीटीव्ही यंत्रणेची स्थापना, तिची देखभाल-दुरुस्ती आणि ती बंद पडण्यासंदर्भातील नोंदी व जबाबदारी कोणाकडे होती, याचीही स्पष्टता होणे आवश्यक असल्याचे रहाटे यांनी म्हटले आहे.

प्राथमिक आरोग्य केंद्र हे रुग्ण, कर्मचारी तसेच नागरिकांच्या दृष्टीने अत्यंत महत्त्वाचे ठिकाण आहे. अशा ठिकाणी सुरक्षा व्यवस्थेचा एक भाग असलेली सीसीटीव्ही यंत्रणा बंद असल्यास तिची तातडीने तपासणी करून आवश्यक दुरुस्ती करणे अपेक्षित आहे. मात्र, यंत्रणा बंद असूनही तिच्या देखभालीबाबतची जबाबदारी आणि दुरुस्तीची कार्यवाही याविषयी स्पष्ट माहिती समोर न आल्याने या प्रकरणाची वरिष्ठ पातळीवर दखल घेण्याची मागणी होत आहे.

सीसीटीव्ही यंत्रणा नेमकी कोणी बसवली, त्यासाठी कोणता निधी वापरण्यात आला, कॅमेरे किती दिवसांपासून बंद आहेत, देखभाल-दुरुस्तीची जबाबदारी कोणाची आहे आणि माहिती अधिकारातील माहिती देण्यास विलंब का झाला, या सर्व बाबींची वस्तुनिष्ठ चौकशी करण्याची मागणी निलेश रहाटे यांनी केली आहे. माहिती उपलब्ध असूनही ती देण्यास विलंब झाला आहे का किंवा माहिती संबंधित विभागाकडे उपलब्ध नसल्याने अर्ज वेळेत योग्य प्राधिकरणाकडे वर्ग करण्यात आला नाही का, याचीही चौकशी करण्याची मागणी त्यांनी केली आहे.

दरम्यान, सीसीटीव्ही यंत्रणा बंद असण्यामागचे नेमके कारण काय, तिच्या देखभालीची जबाबदारी कोणाची आहे आणि माहिती अधिकारातील मागितलेली माहिती देण्यास विलंब का झाला, याबाबत आरोग्य विभागाकडून काय स्पष्टीकरण दिले जाते, याकडे आता नागरिकांचे लक्ष लागले आहे.