रत्नागिरी: भाट्ये ते मांडवी दरम्यान समुद्रात अचानक आलेल्या अजस्त्र लाटांमुळे जुवेब हुश्ये यांची फिशिंग बोट पलटी होऊन सात मच्छिमार संकटात सापडले. समुद्रातील परिस्थिती अत्यंत बिकट असतानाही राजिवडा येथील मच्छिमार आणि सामाजिक कार्यकर्त्यांनी प्रसंगावधान राखत जीवाची पर्वा न करता समुद्रात धाव घेतली. अथक प्रयत्नांनंतर सातही जणांना सुखरूप बाहेर काढण्यात यश आले. या धाडसी आणि मानवतावादी कार्याबद्दल या जीवरक्षक मच्छिमारांचा विशेष सत्कार करण्यात आला.
भाट्ये ते मांडवीदरम्यान समुद्रात मासेमारी सुरू असताना अचानक आलेल्या प्रचंड लाटांचा जोरदार तडाखा बसल्याने जुवेब हुश्ये यांची फिशिंग बोट पलटी झाली. बोटवरील मच्छिमार समुद्रात संकटात सापडल्याची माहिती मिळताच राजिवडा परिसरातील मच्छिमार मदतीसाठी तातडीने समुद्रात उतरले. अजमल उर्फ अज्जु हुनेरकर आणि खालिद होडेकर यांच्या ‘सुरैय्या’ बोटीसह रजिन हुनेरकर यांच्या ‘अनाबिया’ बोटीवरील मच्छिमारांनी बचावकार्य सुरू केले.
समुद्रातील लाटांचा वाढता जोर, बोटींची हालचाल आणि निर्माण झालेली धोकादायक परिस्थिती याची पर्वा न करता अजमल (अज्जु) हुनेरकर, खालिद होडेकर, कैफ होडेकर, यास्मिन पावसकर, माई पाटील, अफान वस्ता, खालिद मजगावकर तसेच ‘अनाबिया’ बोटीवरील शहबाज वस्ता आणि अरमान हुनेरकर यांनी बचावकार्यामध्ये धाडसाने सहभाग घेतला. त्यांच्या प्रयत्नांमुळे समुद्रात अडकलेल्या सातही मच्छिमारांचे प्राण वाचले.
संकटाच्या प्रसंगी स्वतःचा जीव धोक्यात घालून इतरांचे प्राण वाचविणाऱ्या या मच्छिमारांच्या धाडसाचे परिसरातून कौतुक होत आहे. त्यांच्या या साहसाची दखल घेत नगरसेवक अमित विलणकर, मुकुंद विलणकर, साई खेऊर आणि फैयाज हुनेरकर यांनी त्यांच्या घरी जाऊन पुष्पगुच्छ देत या धाडसी मच्छिमारांचा गौरव केला. समुद्रातील संकटसमयी मदतीचा हात पुढे करून सात जणांना जीवदान देणाऱ्या या मच्छिमारांनी माणुसकी आणि धाडसाचे उदाहरण घालून दिले आहे.
